Shillong, Jylliew 27
Ka lympung ïalehkai jong ka 4th Division Under- 20 Football League 2025 ba la pynïaid da ka Shillong Sports Association ka la bteng ha ka Sngi Thohdieng ka 27 tarik Jylliew 2025 ha madan SSA Football Stadium, Shillong.
Ka jingïalehkai ba nyngkong ka la long ha ka por 10:30 mynstep hapdeng ka Riatsamthiah SC pyrshah ïa ka Lawei SC. Ka Riatsamthiah ka la ïoh ban thep ar kol lyngba u Pynskhem Khongdup ha ka minit kaba 4 & 63 ban ïoh shisyndon ïa ka jingjop, katba ka Lawei SC ka la pynphai tang shi kol lyngba u Pynbatskhem Marbañiang ha ka minit kaba 56.
Ha kawei pat ka jingïalehkai kaba bud ha ka por 1:30 nohphai sngi ka New Challenger ka la jop kput ïa ka Krang SC haduh 5-0 kol. Kine san tylli ki kol jong ka New Challenger la ïoh ban thep da u Victor Langte ha ka minit kaba 19, u Jernardo Kharhujon (40+3), u Wanbok Syiemsat (51), u Teilang Shylla (70) bad u Beholding Lawai (72).
Haba phai pat sha ka jingïalehkai kaba lai bad kaba khatduh jong kane ka sngi ha ka por 4 baje janmiet ka Mawñianglah SC ka la jop da 3-0 kol ïa ka Ïateilang SC. U Bantyngshaiñ Nongsteng u la ïoh ban thep baroh lai tylli ki kol ha ka minit kaba 4, 44 & 55.
Kane kajuh ka lympung kan dang bteng lashai ka Sngi Saitjaiñ ka 28 tarik Jylliew 2025 ha kajuh ka jaka SSA Football Stadium Shillong. Ka jingïalehkai ba nyngkong kan long hapdeng ka Mawkasiang SC pyrshah ïa ka Lapalang SC ha ka por 10:30 mynstep, katba ka Them Rangshken pyrshah ïa ka Pynthorbah SC ha ka por 1:30 nohphai sngi bad ka Thynroit SC pyrshah ïa ka Mawshubuit SC ha ka por 4 baje janmiet kaba dei ka jinglehkai kaba khatduh jong kane ka sngi.
