Shillong, Jylliew 27
Ka tamasa kaba paw bha jong ka Jylla ïa kaba la tip kum ka “Cherry Blossom Festival” ïa kaba la ap khmih lynti ba kan sa long biang ha Shillong kan sa long ha ka 14 bad 15 tarik u Naiwieng, 2025 ha kaba ki nongrwai pawnam ha ka pyrthei kum ka “The Script” bad u Jason Derulo kin sa long ki nongrwai kiba paw ki ban sa wan ban pynshongshit ïa ki paidbah ha kitei ki sngi.
Haba kren sha ki lad pathai khubor ha ka Sngi Thohdieng, u Myntri ka tnat jngohkai pyrthei jong ka Jylla, Bah Paul Lyngdoh u la pyntip ba ka Meghalaya ka la ïohpdiang ar tylli ki khusnam ïa kaba la tip kum ka Pan-Asian Awards na ka WOW Awards Asia, kawei na ki rynsan kaba heh jong ka dewbah na ka bynta ka jingai jingithuh ïa ki tamasa kaba la leh da ka Event FAQs bad KPMG.
“Ngi dap da ka jingsngewtynnad ban pyntip ba ka Shillong Cherry Blossom Festival 2024 ka la jop ïa ka khusnam ‘Gold Award’ ha ka ‘Special Event of the Year (Government)’ bad ka Gold Award ha ka ‘Festival of the Year (Arts & Culture) halor ka phangpdeng ‘Culture in Full Bloom’,” ong u Myntri.
U Myntri u la pynbna ruh ba ha ka sien kaba nyngkong yn pynbna ïa baroh kawei ka jaka naduh Hotel Pinewood haduh Ward’s Lake haduh ka madan Polo kum ka jaka ïaid kjat ha kane ka tamasa kaba ar sngi.
“Ngin sa pynshlur ïa ka jingïaid kjat kum ka rukom im. Ka jingïaid lynti sha ka jaka kan long kaba pyrkhing bha ïa ka jingïaid kjat bad yn ym shah ïa ki kali ban ïaid ha kane ka bynta”, ong u Myntri.
U la ong ba ha ka sien kaba nyngkong eh yn sa sam da ki LED Wristbands na ka bynta baroh ki nongwan sha katei ka tamasa khnang ban kyntiew ïa ka jingsngewtynnad jong ka tamasa.
U Myntri u la ong ruh ba ka rai ban pynkynriah ïa ka jaka pynlong ïa katei ka tamasa sha ka JN Stadium ha Shillong ka long halor katto-katne ki daw kynthup ïa ka jingpynbha ïa ka jaka sah, ka jingpynpoi ïa ki mar ki mata, bad ka jingithuh ïa ka nongbah kum ka nongbah jong ka jingrwai jong ka ri India.
U Myntri u la ïathuh ba ka jingkynshew pisa ka Sorkar Jylla kaba T.23.5 klur ha ka jingpynlong ïa ki tamasa bapher-bapher mynshem snem ka la wanrah ïa ka jingpynmih ha ka ïoh ka kot kaba long T.133.42 klur, kaba long hynriew shah ïa ka jingkynshew.
“Ha u snem ba la dep, ka sorkar jylla ka la bei tyngka T.23.5 klur kum shi bynta ban kyrshan ïa ki tamasa bapher-bapher bad ha kajuh ka por, ngi la pynmih ïa ka jingkyntiew ïa ka ïoh ka kot baroh kaba T.133.42 klur, kaba long kumba hynriew shah ïa ka jingmih na ka jingbei tyngka jong ngi”, ong u Myntri.
Haba ïathuh ïa ki jingtip ba kongsan na kane ka aïom tamasa, u Myntri u la ong ba ha u snem ba la dep, kine ki tamasa ki la khring haduh 3.86 lak ngut ki nongwan jngohkai pyrthei, kynthup ïa 76,000 ngut ki nongjngohkai pyrthei kiba long 4.7% na ka jingwan jngohkai pyrthei jong ka Meghalaya manla u snem tang hapoh ar taiew bad ong ba ka Shillong bad ka Sohra ki la ïohi ïa ka jingdap ki jaka sah, kaba la noh synñiang T.33.78 klur.
U la ïathuh ba haduh 60,000 tylli ki durkhih ba la thep ha ki rynsan ‘social media’ bad haduh 22 million ngut ki briew kiba peit ïa kine durkhih lyngkot (reel).
Haba phai sha ka ïoh ka kot, u Myntri u la ïathuh ba ka jingpynmih pisa na ki tiket ka la kot haduh T.29.1 klur, ka jingïoh kamai ki ïingbasa ka long T.33.8 klur, bad kiwei kiwei ki kam kum ki kam kamai kali, ka jingïadie-ïathied ka long T.37.1 klur, ka bam ka dih ka long T.6.9 klur bad ka jingpynlut ha kine ki tamasa ka long T.18 klur.
U ïathuh ba kane ka aïom tamasa ka la wanrah ruh ïa ka lad aikam aijam bad haduh 5509 ngut kiba ïoh kam na kine ki tamasa.
U Myntri u la pyntip ba ki nongwankai na kylleng ki Jylla ka Ri bad ka pyrthei ki la wan ïashimbynta ha kine ki tamasa ba kynthup ïa 1762 ngut na Maharashtra bad 224 ngut na Odisha nalor kiwei-kiwei ki Jylla, katba ki nongjngohkai pyrthei kiba palat 18,000 ngut ki la poi da ka liengsuiñ, kaba la noh synñiang T.16.80 klur ha ka khajna na ka liengsuiñ bad T.5.38 klur ha ka jingshakri lyngba ki saw shaka.
Nalor kane, u Myntri u pyntip ba ka Shillong bad Sohra ki la mad ïa ka jingdap ki ïing basa na ka jingwan ki nongshangkai, kaba synñiang haduh 27% na ka jingpynmih pisa jong ka.
Haba jubab ïa ka jingkylli, u Myntri u la ban jur ba ka Meghalaya ka la don hakhmat eh ha ka jingkyntiew ïa ka ïoh ka kot lyngba ki jingput-jingtem (concert economy), ka jingmut ba la kren dang shen da u Myntri Rangbahduh ka Ri.
“Ka jingpyrshang jong ka Sorkar Jylla ka la ai shibun ki jingmyntoi, kaba pyni ba ka ‘concert economy’ kan ïaineh bad long shibynta jong ka ïoh ka kot ka Jylla Meghalaya”, ong u Myntri.
Haba kylli halor ka synñiang ki kam jngohkai ïa ka GDP ka Jylla, u Myntri u la ïathuh ba ki kam jngohkai ki la kylla long ka ïoh ka kot ba wan ba lai ha ka jingheh duh ha Meghalaya.
