Shillong, Jylliew 27
Ka jingïakren kaba dang ïaid shakhmat halor ka jingpynbeit ïa ka jingrung ki briew kiba nabar sha ka jylla Meghalaya ka la jur bha ha kaba na ka liang u Myntri Sorkar bad uba dei ruh u nongaiktien ka MDA-II, u Bah Paul Lyngdoh u la pynskhem ba ka Meghalaya Residents Safety and Security Act (MRSSA) kam dei ka Aiñ kaba la shna ban bujli ïa ka Inner Line Permit (ILP).
Kane ka jingkren jong u Myntri ka wan hadien ba ki kynhun sengbhalang ki la pynkynmaw biang ïa ka Sorkar halor ka jingdawa jong ki ban pyntreikam noh ïa ka ILP ha ka Jylla, hadien ka jingjia ki kam runar kiba dang shu dep jia shen hapoh ka Jylla kiba la kynnoh ba ki dei ki briew ki bym dei ki trai shnong kiba la wanrah ïa ki jingjia kiba har rukom.
Haba kren sha ki lad pathai khubor ha ka Sngi Thohdieng halor ka jingong jong ka Voice of the People Party (VPP) ba ka MRSSA kam lah ban long ka Aiñ kaba mih bujli ha ka jaka jong ka ILP, u Myntri u la ong ba ka MRSSA ka dei tang ka Aiñ ba la shna da ka Sorkar Jylla ïa kaba lah ban pynkylla ha kano-kano ka por kum ka jingdonkam ka Sorkar Jylla.
“Phi ïohi, ka MRSSA kam dei ban long ka jingpynkylla ne ka jingpynrung ïa ka ILP, hynrei ka MRSSA ka dei ka Aiñ jong ka Jylla ha kaba ka Sorkar bad kumjuh ruh ka Ïingdorbar Jylla ka la don katto-katne sien ka jingïatai”, ong u Myntri.
U la kdew ba ka ILP ka la mih na ka aiñ jong ka Eastern Bengal Frontier Regulation ha ka por synshar phareng.
“Kumta haduh katne, ka MRSSA kan ailad ruh ïa ka Ïingdorbar Jylla ban wanrah ïa ki jingpynkylla na ka por sha ka por, katkum bad ha ka por ba donkam,” u la ong.
“Kumta nga iehnoh ha ka jingstad jong ki nongjied, hynrei hangne ngi don ïa ka Aiñ Jylla kaba ngi don ka jinglaitluid ban pynbha ha kano-kano ka por,” la bynrap biang u Lyngdoh.
Ha kajuh ka por, ka Sorkar Pdeng ka dang bishar bniah ïa ka jingkyrpad ba thikna jong ka Jylla Meghalaya ban ïoh ïa ka ILP.
