Shillong, Jylliew 27
U Myntri ka Tnat Jngohkai Pyrthei, Bah Paul Lyngdoh, ha ka Sngi Thohdieng haba kren bad ki nongthoh khubor u la ïathuh ba ka Sorkar Jylla kan sa ïasoi shen ïa ka Memorandum of Understanding (MoU) bad ka jylla Assam haba ïadei bad u pud u sam bad ïa kane kin sa leh ha ka 15 tarik u Nailar (August), bad san tylli ki shnong ha ki thaiñ Ri-Bhoi kin sa wan phai biang sha ka jylla.
U Bah Paul u la pynpaw ba kine san tylli ki shnong ki dei kiba hap hapoh ka Ri-Bhoi district. Kane kan dei kawei pat ka sien jam ba ka sorkar ka la leh ban pynbeit ïa u pud u sam jong ka Jylla kaba la sah khongreng khlem leh eiei ha kine ki snem ba la dep.
Haba ïadei bad ka thaiñ Langpih kaba u long kum Chairman ka Regional Committee, u Bah Paul u la ong, ba ki kam ki la ïaid shaid-shaid bad kaba sah mynta ka dei sa tang ban leit jurip ïa ki jaka hapdeng ka Jylla Meghalaya bad ka Jylla Assam.
Haba ïadei pat bad ka jingong ba ka Sorkar Jylla ka leh tang khyndiat halor ka jingjia ha Lapangap, na ka liang u Bah Paul u la ong ba ka sorkar ka la phah da ka kynhun ki pulit bad u majistor ban leit khanglad ïa ka jingwan tur ki briew na ka jylla Assam, da kaba bynrap ba kam long kaba dei ban ong ba ka sorkar ka leh tang khyndiat.
