New Delhi, Jylliew:
U nongialam ka Iran, u Ayatollah Ali Khamenei haba ai jingkren sha ki nongthoh khubor ha Iran, u la ong ba ka Iran kan ym aili satia ia ka US ba kan leit ban tuklar ia ki kam bad jingthmu jong ka bad kan ym ailad shuh ia kano- kano ka jingthombor ha ka lawei kan wan. Kane ka jingkren na utei u heh ka Iran, ka long hadien ka jingsangeh iasiat hapdeng ka Iran bad ka Israel kaba la sdang treikam naduh ka miet Sngi Ba-ar. Kane ka jingsangeh thma ka long hadien ba ka US ka la thombor ïa ki lai tylli ki shlem nuclear jong ka Iran bad ka jinghiar thma pynrem jong ka Iran ïa ka ktem jong ka US ha Qatar.
U president jong ka United States- Donald Trump, u la kdew ha kawei na ki jingkren jong u hadien katei ka jingsangeh thma, ba ka Iran ka dei ban pyndem noh. Kan pyndem noh! Kam dei shuh ban buh jingkyrmen ha ka kam shna tiar nuclear. Kumta, u Khamenei u la ong ba katei ka jingkhmih lynti jong ka US kan ym lah ban urlong da lei-lei ruh namar ka Iran kan ym pyndem ia ka US ne kino-kino ruh ki bor ba nabar ban tuklar ia ki kam bad jingthmu jong ka.
Haba ïadei bad ka jingleit hiar thma jong ka Iran ïa ka ktem liengsuiñ jong ka US ha Al Udeid ha Qatar, u Khamenei u la ong, “Ka jingshisha ba ka Islamic Republic ka don lad ban leit sha ki jaka ba kongsan jong ka US ha kane ka thaiñ bad ka lah ban leh ia kane ha kano-kano ka por ba ka sngew donkam.”
“Ki nongshun jong ka Iran ki pyndonkam ïa ki daw kum ki missile ne ka prokram nuclear jong ngi, hynrei ha ka jingshisha ki kwah ïa ka jingpyndem jong ngi. U Trump u la pynpaw ïa ka jingshisha ba ka US kan pdiang bad sngewhun tang lada ka Iran kan pyndem noh ialade hakhmat ka US. Hynrei ka jingpyndem kan ym jia satia, ka jaitbynriew jong ngi ka long kaba donbor,” u la ong.
Shuh shuh, utei u nongialam u la ong ba ka Iran ka la pyni ia ka bor jong ka markhmat bad ka US. Ka Iran ka la dep pynjulor ia ka Ai-Udeid Air Base jong ka US, kaba long kawei na ki jingtei ba kongsan tam jong ka US ha katei ka thaiñ.
