Shillong, Jylliew 27
Ki nonghikai jong ka skul Sohksar Upper Primary SSA School ha ka Sngi Thohdieng jong ka 27 tarik Jylliew, 2025, ki la pynpaw ïa ka jinglyngngoh halor ka jingshah pynduh tulop na ka bynta u bnai Jymmang 2025.
Haba ïakren bad ki lad pathai khubor ha Shillong Press Club (SPC), u Bah Dominic Mawlong uba dei u nonghikai jong katei ka skul, u la pynpaw ba kum ki nonghikai ki la ïakynduh ïa ki jingeh haba ïadei bad ka jinghikai jong ki ha katei ka skul.
U Bah Mawlong u la ong ba kane ka skul haduh mynta u snem 2025, kam don khynnah skul shuh bad kane ka dei na ka daw ba ka don ka kynrum-kynram bad ka jingbym biang jong ka Managing Committee jong ka skul kaba pynlong ïa kane ka skul ban ym don khynnah skul shuh.
“Mynta kumba 2-3 snem, kam don shuh kata ka jingïahap jingmut bad kane ka School Managing Committee, namar kata kin sa mih kine kiei-kiei baroh bad ka ban sa ïalam ïa kane ka sur ba kan long kumne kumba ka long mynta,” ong u Bah Mawlong.
Haba ïadei bad ka jingsiew ïa ka tulop jong ki nonghikai skul, u Bah Mawlong u la ïathuh ba ka tulop jong u bnai Jymmang kim pat shym la ïoh bad haduh mynta ki la sah hapdeng ka jinglyngngoh halor ka jingleh ka ophis jong ka skul ka bym pat shym la siew satia ïa ka tulop jong ki.
Shuh-shuh, u Bah Mawlong u la ïathuh ba haba ïadei bad ka jingbym don khynnah skul, na ka liang jong ki kum ki nonghikai ki la dep ai jingtip sha ki ophis bapher-bapher kiba dei khmih bad ki la phah ruh da ki jingthoh ha ka ban phah hikai noh ïa kitei ki nonghikai sha kiwei pat ki skul namarba kane ka skul kaba ki hikai kam don khynnah shuh.
U Bah Mawlong u la ïathuh ba ki don 3 ngut ki nonghikai ha katei ka skul ha kaba kawei ka nonghikai ka dei ka 4th Teacher bad ar ngut pat ki dei ki nonghikai SSA.
U la ïathuh ba ka 4th Teacher ka la ïoh ïa ka tulop na ka bynta u bnai Jymmang hynrei kitei ar ngut ki nonghikai SSA pat ki khlem pat ïoh satia ïa ka tulop jong ki.
