Moscow, Jylliew:
Ha kawei ka durkhih ba la saphriang paidbah bad kaba la wanrah ia ka jingpynrem jur na ki paidbah nongpyndonkam Social Media, la ong ba la iohi ia uwei u briew uba la shim ia utei u khyllung 2 snem bad lympat ia u ha madan jong ka jaka hiar Kad Liengsuiñ hapoh ka nongbah Moscow jong ka Russia.
La ong ba utei u khyllung u la mynsaw jur haduh katta-katta bad ka shyieng khlieh jong u ka la pait bad kumjuh u shyieng budlum u la kheiñ. Ia mynta hi, la ong ba utei u khynnah um shym tip-briew eiei shuh bad u don hapdeng ka jingshitom bym tip-briew shuh lane ka ‘Coma’ kaba ju iatip paidbah, ha kaba ki briew kiba ioh ia kane ka jingpang kim khih, kim khie bad kim tip-briew eiei shuh bad ki la shu thiah kum kiba iap hynrei ki dei kiba dang don mynsiem.
Ki bor pyniaid ki iathuh ba utei u khyllung u la leit poi sha Russia hadien ba ma u bad ka kmie jong u, ki la wan phet noh sha Russia namar jong ka thma ha Iran.
Kumta, ha katei ka durkhih, la iohi ia utei u khyllung 2 snem uba dang ïaid la ka jong ka lynti, katba u dang bat ia ka kti jong ka pla troli jong u ha kad liengsuiñ, ha kaba la iohi ia uwei pat u briew uba peit sha ka khlieh bad ki kti ha ki pla jong u, uba ieng hadien jong utei u khyllung bad uba phong ia ka T-shirt lieh bad ka sopti lyngkot. La iohi ba utei u briew, u peit syntiat sawdong jong katei ka jaka, ban iohi la ki don ne em kiba peit sha u bad hadien kata u la iaid kham shajan jong utei u khyllung bad nangta u shim ia utei u khynnah bad lympat ia u ha madan. Ia katei ka durkhih la pyllait da ka tnat Embassy jong ka Iran hapoh ka rynsan ‘X’.
Hadien kata, la iohi ia uwei pat u briew uba la leit mareh ban kynrup ia utei u khynnah uba la mynsaw jur, katkum ba la iohi ha katei ka durkhih. Kane ka jingshah thombor ka la jia ha ka por ba ka kmie jong utei u khynnah kaba dang pun sa iwei pat i khun, ka dang shim ïa ka pla kit tiar jong ka hadien ba ka liengsuiñ jong ki ka la poi ha ka Kad Liengsuiñ ha Sheremetyevo.
Utei u nongthombor- uba la ithuh kum u Vladimir Vitkov, 31 snem ka rta na Belarus- la iohi ha ki dur jong ki bor pahara ba u peit bha ia utei u khynnah uba don hajan ka suitcase jong u.
Ki pulit ki dang wad bniah ban lap la katei ka jingthombor jong u ka dei namar ki daw la ka dei ka jingsngewpher jaitbynriew ne kiwei pat ki jingthmu kiba la pynlong ia utei u runar ba un leh ia katei ka kam pap pyrshah ia utei u khyllung rit uba dang 2 snem ka rta.
Ki nongap pahara jong katei ka Kad Liengsuiñ, ki la bat bad ki la kem noh ia utei u runar ha katei hi ka por ba la lap ia katei ka jingjia bad la suba ruh ba lah ban dei ba utei u briew u la buaid drok ne kino-kino ki jingdih kiba ktah ia ka khlieh jong u, haduh ba um don shuh ka mynsiem iatip lem wat ia ki khyllung- ki khynnah kiba dang shida bad lui-lui.
