Shillong, Jylliew 27
U heprit Sngipynkmenlang Kurbah Sngi, 4 snem ka rta bad ka Kong Kmoin Wahlang, 78 snem ka rta ki la ïoh khusnam pisa kum ki nongïashim bynta barit rta bad baheh rta tam na ka lympung Marathon ba la khot pynlong da ka National People’s Youth Front (NPYF) East Khasi Hills bad Shillong City ha ka step 26 tarik u Jylliew, 2025.
Kane ka marathon ka dei shi bynta ka jingïalap ki samla treikam ka NPYF ban ong em ïa u drok kaba dei ruh kum ka jingrakhe ïa ka International Day Against Drug Abuse And Illicit Trafficking ha kane ka sngi.
Ïa kane ka marathon la bynta ha ki ar kyrdan kata na ka bynta ki kynthei bad shynrang kiba hapoh 14 snem bad kiba la palat ïa kane ka rta.
La kaweh lama sdang ïa ka Marathon da u Bah Gavin M Mylliem, MLA na Sohra ha ka jingdonlang ki bor pulit na Thanat Sadar, ki dkhot bad nongïalam ka NPYF East Khasi Hills bad Shillong City ha kaba la sdang shwa da kiba hapoh 14 snem ka rta bud pat sa kiba la palat ïa kane ka rta.
Hadien ba la pyndep ïa ka jingmareh, la pynlong ïa ka jingïalang sam khusnam ba lyngkot ha kaba nalor u Bah Gavin kum kongsan, la ïadonlang u Bah Hamletson Dohling, Working President ka NPP, u Bah Himalaya M Shangpliang, Spokesperson, u Bah Emlang Lytan bad kiwei-kiwei pat.
Kiba jop ha ka kyrdan ba nyngkong ki la ïohpdiang ïa ka khusnam pisa mar T.20,000 tyngka, kiba wan ba ar mar T.10,000 tyngka, kiba wan ba lai mar T.5,000 tyngka, nalor mar san tylli ki Consolation Prize T.2,000 tyngka marwei bad ka khusnam pisa sha ka Kong Kmoin bad sha u heprit Sngipynkmenlang.
Na ka liang u Bah Hamletson Dohling u la ong ba ka thong jong kane ka Marathon ka long ban ïalap pyrshah ïa u drok uba la ksam mynta ïa ki khun samla bad kum ka seng ka kwah ban phah ïa ka khubor ban pyrshah jur ïa une u jingdih pynbuaid.
