Shillong, Jylliew 27 (UNI)
Ki ar ngut kiba la shah kynnoh donkti ha ka ban pynïap ïa u nongkhaïi na Indore, u Raja Raghuvanshi ki la kyntait ban kren hakhmat u majistor wat haba ki pulit ka Jylla ki la pynskhem ba ki don ïa ki sabut kiba biang halor ka jingdonkti jong ki ha katei ka kam.
U Akash Rajput bad u Anand Kurmi – 2 na ki 5 ngut kiba la shah kynnoh donkti ha katei ka kam – kim shym la kwah ban ai jingkren hakhmat u majistor katkum ka kyndon 164 jong ka Code of Criminal Procedure (CrPC) ha kaba ïadei bad kane ka mukotduma, ong u heh pulit, Bah Herbert Kharkongor, uba khlieh ïa ka Special Investigation Team (SIT) halor ka jingshah pynïap u Raja.
“Ngi la phah tang ïa 2 ngut na ki 5 ngut kiba shah kynnoh donkti sha u majistor. Kim shym la kwah ban ai kano-kano ka jingkren bad ka dei ka hok jong ki. Hynrei ngi don ïa ki sakhi-sabut kiba biang. Ngi dang ap ruh ïa ka kaiphod FSL (Forensic Science Laboratory) ka ban pynkhlaiñ shuh-shuh ïa ka mukotduma,” ong u Bah Kharkongor.
Haba kdew ba ki jingphla ki pulit kim long kiba lah ban pdiang hapoh ïingbishar, u Bah Kharkongor u la ong, “Ka dei ka hok jong ki ban ym pynpaw ïa ka jingphla. Hynrei ki sabut ki long kiba kongsan bha. Ym don jingeh. Ngi don ki sabut kiba biang ha kane ka mukotduma.”
Ka jingphla hakhmat u majistor katkum ka kyndon 183 jong ka aiñ BNSS, 2023 ka long kaba pdiang da ka ïingbishar. U majistor u lah ban pyndonkam da ki lad ‘electronic audio-video’ ban lum thup ïa ka jingkren, khamtam ha ka jingdon lang u nongsaid aiñ jong uba shah kynnoh.
Da kaba pynpaw ïa ka jingkyrmen skhem ba ki pulit ki don ïa ki sabut kiba biang ban tei ïa ka mukotduma kaba khlaiñ, u Bah Kharkongor u la ong, “Ka jingtohkit ïa kane ka mukotduma ka dang ïaid shakhmat. Shisien ba ngi long kiba la khreh, ngin sa mudui (chargesheet) ïa ka mukotduma hapoh 90 sngi.”
Hashuwa, ki pulit ka Jylla ki la kam ba baroh 5 ngut kiba shah kynnoh donkti ki la phla ïa katei ka kam runar.
Ki pulit ki la kem ïa ka Sonam Raghuvanshi, ka kurim jong u Raja, u samla jong ka, u Raj Singh Kushwaha lem bad 3 ngut kiwei pat kiba shah kynnoh donkti lang – u Anand, Akash bad u Vishal Singh Chauhan, kiba la shah kem halor katei ka kam runar kaba la jia ha ka 23 tarik u Jymmang.
Ka SIT ka la kem ruh sa ïa 3 ngut ki briew – u Lokendra Singh Tomar, Silome James bad u Balla Ahirwar ba ju khot ‘Ballu’- halor ki jingkynnoh ba ki la ïarap ïa ka Sonam bad u Raj, bad ban pynduh-pyndam ïa ki sabut ba kongsan kiba ïadei bad katei kam pynïap briew.
U Tomar, u dei u trai jong kawei ka ïingsah (flat) ha Dewas Naka ha kaba ka Sonam ka la sah, ha ka por ba ka dang phet rieh sha Indore, (hadien ka jingshah pynïap u kurim jong ka), katba u James, u dei u nongdie jaka, uba la ai wai ïa katei ka ‘flat’ sha u Vishal bad u Balla, uba dei u nongap pahara bad nongtrei dieng, ha katei ka thaiñ.
Kitei ki 3 ngut ki la thang ïa kawei ka pla kaba don katto-katne ki tiar ki bym lah ban tip, ïa kaba dang phah peit bniah ha ka tnad ‘Forensic’. Ki la bret ruh ïa kawei ka pistol bad ki la weng noh ïa ka ‘Laptop’ bad ka pisa na ka pla.
Ïa katei ka pistol shna hi la lap na ka wahduid bad ka pisa kaba kot T.50,000 la lap na kawei ka kali (MP09WG 2352) lyngba ka jingïarap jong u James. Hynrei ïa ka ‘Laptop’ bad katto-katne ki jingdeng remdor ym pat lap haduh mynta.
Ka Ïingbishar (District & Session Judge) ha Jylla ha ka Sngi Palei ka la ai bor 6 sngi ïa ki pulit ban tohkit ïa kitei ki 3 ngut.
