Khliehriat, Jylliew 27
Ka ‘8-Shnong Aquatic Life Environment Protection Council’ East Jaiñtia Hills District ka ai ka jingkyrshan kaba pura ïa ka jingphah tohkit na u Deputy Commissioner ka distrik sha u Superintendent ka tnad dohkha-dohpnat, Khliehriat halor ka jingïap ki doh-um ha Wah Prang, kaba la ju jia man ka snem ha ka por ba wan u slap thymmai jong ka aïom lyiur.
Ka jingphah tohkit ka la mih na ka jingujor ba la wanrah da u samla Andrias Talang, uba dei u samla pule aiñ ha North-Eastern Hill University (NEHU), Shillong.
U samla Andrias u la dawa ba dei ban shimkhia bad tohkit bniah halor ka daw kaba pynlong ïa ki doh-um ban ïap ha katei ka Wah, kaba long ka jingma ha ka koit ka khiah jong ki paidbah, khamtam kito kiba im ja na kaba khwai bad tong doh na katei ka Wah ha ki shnong kiba don sawdong kum ka Lama, Borghat, Hingaria bad kiwei.
Une u samla u la pynpaw ruh ba dei ban leh eiei mardor namar bun na ki nongshong shnong ki shaniah ha katei ka wah bad kamai ja kpoh, hynrei lada ki doh um ki long kiba don bih ne bym bit shuh ban bam, kane ka lah ban wanrah jingma ïa ka koit ka khiah jong ki paidbah.
Ha kane ka bynta, ka ‘8-Shnong Aquatic Life Environment Protection Council’ ka la pynpaw ka jingpynsngewnguh bad jingkyrshan ba pura ïa u samla Andrias Talang halor ka jingshimkhia jong u.
Ka Council ka ong ruh ba katei ka wah ka dei kawei na ki tyllong ba heh duh jong ki doh-um ba dang im hapoh East Jaiñtia Hills, kaba ki paidbah ki ju ïoh ban khwai doh watla man la u snem ka don ka jingïap jong ki doh um.
Na ka liang ka Council ka pynpaw ruh ba ki doh-um ki ju wan kiew biang sha katei ka wah na bynta jong ka Bangladesh haba ka um ka la kiew ba la duna ka bih kaba pynïap ïa ki doh um, hynrei ka jingdon jong ka jingïap doh man la u snem ka lah ban paw kum ka dak ba ki doh-um ki lah ban long kiba don jingpang.
Na kane ka daw, ka Council ka kyntu jur ïa ki paidbah ban dang ïaishah shi por ha ka jingkhang ban khwai ne bam doh na katei ka wah haduh ban da mih ka kaiphod na ka tnad dohkha-dohpnat. Kane ka long na bynta ka jingmyntoi lang jong ka koit ka khiah bad ka jingbha jong baroh.
Shuh shuh ka Council ka la rai ban ïai buddien bad ïatreilang bad ki bor Sorkar halor kane ka kam, na bynta ban pynneh-pynsah ïa katei ka wah kumba ka ju long mynshwa-ka tyllong doh-um ba khuid, ba im, bad ba ai jingmyntoi sha ki paidbah ka Ri-lum Jaiñtia bad ki nongwan khwai na kylleng.
