New Delhi, Jylliew:
U Lamphang jong ka tnat kam bar ri ka India, u Randhir Jaiswal, u la ong ba ka India tad haduh jong ka step Sngi Ba-ar, ka la dep pynkynriah ia 3,426 ngut ki nong India na Iran bad kumjuh ruh ia kiwei pat ki 818 ngut ki nong India kiba don ha Israel bad ia kane la lah ban pyn urlong hapoh jong ka ‘Operation Sindhu’ jong ka India, ban leit shaw noh ia ki paidbah nongshong shnong jongka, kiba sahkut ha kitei ki ri namar ka jingma kaba ap ia kitei ki ri hapdeng ka jingiakynad jongki.
U Jaiswal u la ong ba ka India ka la sdang ia kane ka prokram leitshaw briew naduh ka 18 tarik jong une u Jylliew namar ki don kumba 10,00 0 tam ki paidbah nong India kiba shong- ba sah hapoh Iran bad palat 40,000 tam kiba shong-sah lane kiba leit pule- leit trei ha Israel.
Kumta, la ong ba ka India ka la ioh ban leitshaw noh shwa ia ki 3,426 ngut na Iran, kynthup ia 9 ngut kiba long ki nong Nepal bad katto- katne ngut ruh ki nong Sri Lanka.
La iathuh ruh ba ha katei ka sngi, kan don sa kawei pat ka liengsuiñ paidbah ka ban mih na Armenia bad ka ban poi sha India ha katei hi ka jan miet. Da kane ka sien leitshaw, la ngeit ba ka India ka la ioh ban kit lut noh ia baroh kito ki paidbah kiba kwah ban mih noh na kitei ki ri bad ban wan phai biang noh sha India.
U Jaiswal u la ai khublei ruh ia ka sorkar Iran, kaba la ailad ia ka India ba kan pyndonkam ia ki lynti suiñ jongka, naka bynta ban pyndep ia ki jingthmu bad ki kam jong ka India ha ka ban leitshaw ia ki paidbah nongshong shnong jong ka.
