Shillong, Jylliew 27
Ka Meghalaya State Commission for Protection of Child Rights (MSCPCR), ha ka 24 tarik mynta u bnai ka la plie paidbah ïa ka ‘website’ ba la pynthymmai jong ka Commission.
Ïa kane ka ‘website’ la pynthymmai na bynta ban pynsuk ïa ki paidbah ha ka ban pyndonkam bad ban kyntiew ïa ka jingsngewthuh shaphang ka Commission bad ruh ban pynbha ïa ka jingïadei hapdeng ka Commission bad u paidbah ba bun balang.
Kane ka jingplie paidbah ka la urlong ha kajuh ka sngi bad ka jingïasoi ïa ka Memorandum of Understanding (MoU) na bynta ban thaw ïa ka ‘Portal’ ban buddien ïa ki kam runar pyrshah ïa ki khynnah bad da ki khynnah katkum ka Juvenile Justice Act, 2005.
Ïa kane ka MoU la ïasoi hapdeng ka MSCPCR bad ka National Informatics Centre (NIC), Meghalaya.
Ïa kane ka ‘website’ ba la pynthymmai la plie paidbah da u Myntri ka tnad Social Welfare, Bah Paul Lyngdoh, ha ka jingdon lang ka Chairperson ka MSCPCR, ka Agatha K. Sangma, bad ka Chairperson ka Meghalaya State Commission for Women (MSCW), Kong Ïamonlang M. Syiem.
Ha kane ka jingïalang, u Myntri u la pynpaw ka jingsngewkhia halor ka jingkiew ba dang shen jong ki kam runar pyrshah ïa ki khynnah bad da ki khynnah bad kdew ïa ki kam jingjop jong ka tnad Pulit halor katto-katne ki mukotduma kiba ïadei bad ka jingïada ïa ki khynnah bad ban jur halor ka jingkular ka Sorkar ban pyntikna ïa ka jingïada ïa ka hok jong ki khynnah ha ka Jylla.
