Shillong, Jylliew 27
Ka kynhun ki samla pule ‘Bachelor of Arts’ jong ka laiñ pule English bad Political Science jong ka Synod College, ha ka Sngi Thohdieng ka la leit jngoh ïa ka ophis jong ka Press Information Bureau (PIB), Shillong, kum shi bynta jong ka prokram ‘Internship’ jong ki.
Kane ka jingleit jngoh ka thmu ban pyni ïa ki samla pule ïa ka rukom treikam bad ka bynta jong ka ophis ai jingpyntip ka Sorkar Pdeng.
Ïa ki samla pule la ïalam da u nongthoh khubor, Bah Starfing Pdahkasiej.
Ha kane ka jingïakren, u Assistant Director ka PIB Shillong, u Gopajit Das u la pdiang sngewbha ïa ki samla pule bad batai lyngkot ïa ka jinglong-jingman jong ki kam ki jam bad ki jingkitkhlieh jong ka PIB Shillong. U la batai bniah kumno ka tnad ka pynphriang ïa ki jingtip shaphang ki polisi, ki skhim bad ki sienjam jong ka Sorkar sha ki lad pathai khubor bad ki paidbah.
Ha kane ka jingïalang, la ïakren ruh ïa ki phang kiba kongsan kynthup ïa ka bynta jong ka tnad pyntip bad pynphriang khubor, ki aiñ kiba ïadei bad ki kyndon jong ka riti synshar bad ki lad pathai khubor bad ki rukom treikam ban pynïaid ïa ka jingpynpoi ïa ki jingtip lyngba ka lad ‘digital’.
Na ka liang samla pule ki la ïashim bynta shitrhem ha ka jingïakren bad ki la buh ïa ki jingkylli kiba ïadei bad ki mat halor kumno ka tnad ka khmih ïa ki jingtip kiba bakla bad ki jingkynthoh pyrshah ha ka juk jong ka ‘Social Media’. Shuh shuh la batai sha ki shaphang ki atiar bad ki lad ki lynti bapher-bapher kiba don na bynta ban peit bniah ïa ki jingshisha bad ban pynneh ïa ka jingshaniah ha ka jingai jingpyntip da ka Sorkar.
Nalor kata, la batai ïa ki samla pule shaphang ki lad ki lynti hapoh ka tnad pathai khubor, bad ka jingïadei bad ki paidbah. La pynshlur ruh ïa ki samla pule ban bud ïa ki jingsngewtynnad jong ki da ka jingaiti lut.
Kane ka jingleit jngoh ka la kut da ka jingïasam jingmut bad ki kyntien ai mynsiem, bad kumjuh ka jingwad ïa ki lynti bapher-bapher na bynta ki kam jong ki ha ki por ban wan.
