Shillong, Jylliew 27
Ka Jaiñtia Joint Action Committee Border Issue (JJACBI) ha ka Sngi Thohdieng ka 27 tarik u Jylliew 2025 ka la leit ban ïakynduh ïa u Bah Prestone Tynsong, Myntri ka tnad kam pohïing ban kyntu ba un phah mardor ïa ki pulit Special Force -10 (SF10) sha ka shnong Lapangap, West Jaiñtia Hills.
Ïa kane ka jingdawa ka komiti ka la kdew halor ka jingjur ka jingïakynad kaba la wanrah da ka Karbi Anglong Autono-mous District Council (KAAC) bad kiwei ki kynhun ïatreilang kiba la khanglad ïa ki kam rep jong ki nong Lapangap khamtam eh ha ka por ba thung bad ot kba.
Ka komiti ka la kynnoh ruh ba ki pulit ka Assam ki treikam shiliang khmat kata ban kyrshan ïa ki katto- katne ki kynhun jaitbynriew Karbi bad kane ka la wanrah ka jingbym shngaiñ hapdeng ki jaitbynriew Pnar ba shong ba sah ha ka shnong Lapangap bad ki jaka marjan kumjuh.
Nalor kane, ka la pynpaw ruh ba ka la donkam ïa ka Sorkar Jylla ban phah da ki pulit SF-10 ban ai ka jingïada na ka jingshah pyntieng, ban tehlakam ïa ka jingshah khanglad ban trei ïa ki kam rep, ban wanrah biang bad pynneh ïa ka jingsngewshngaiñ hapdeng ki nongrep bad ki longïing.
Namar kata, ka komiti ka la kyntu ïa ka Sorkar Jylla ban leh kyrkieh ïa kane ka kam bad ban pyntreikam da ki pulit SF-10 ha ka por ba thung bad ot kba khnang ban ïada ïa ka hok, ka jingim jong ki paidbah jong ka shnong Lapangap.
