Shillong, Jylliew 27
Ka Hynñiewtrep Border Dispute Redressal Forum (HBDRF) ha ka Sngi Thohdieng ka la phah da ka dorkhas sha u Myntri Rangbah ka Jylla, u Conrad K Sangma ban tuklar halor ka jingjia ïakajia pud hapdeng ka Assam bad ka Meghalaya ha ka shnong Lapangap.
Ïa kane ka dorkhas la aiti da u nongaiktien ka HBDRF u Bah Thomas Passah.
Ha kane ka dorkhas, ka HBDRF ka la kynnoh ba ka Karbi Anglong Autonomous Council ha ka 10 tarik u Jylliew ka la thung dieng ha ka shnong Lapangap Block-1 khlem ka jingïasyllok bad ki khlieh synshar shnong.
Halor kane ka HBDRF ka la buh da ka jingujor ha ka ophid u Deputy Commisioner ka West Jaiñtia Hills District.
“Ïa ka jingïalang la pynlong ha ka 19 tarik u Jylliew 2025 hapdeng u DC, SP ka West Karbi Anglong bad West Jaiñtia Hills District ha IB Khanduli, ha kaba la rai ban pynsangeh ka shongsuk shongshngaiñ bad ban pynsangeh ïa ka prokram thung dieng. Hynrei na Assam ki la pynkheiñ ïa kane ka jingïateh kular bad bteng ïa ka jingthung dieng khlem da ïasyllok ïa ki nongïalam shnong,” la kynnoh ka HBDRF.
Nalor kane, ka la kynnoh ruh ba ki paid Karbi ki la pynjulor bad thang ïa ki lyngkha kba jong ki paid Pnar bad ha ka 26 tarik u Jylliew 2025 ki pulit ka Assam ki la wan ban kerkut ïa ka jaka bad pyrshang ruh ban shna ïa ka ktem.
Namar kata, ka la kyntu ïa ka sorkar jylla ba ka dei ban buh ïa bun ngut ki pulit SF-10 ha ka thaiñ na ka bynta ka jingshngaiñ ki paidbah ha ka shnong Lapangap bad ban khang ïa ki pulit ka Assam ba kin wan shna ktem ha ka thaiñ.
Shuh shuh ka la kyntu ruh ïa baroh ar ngut ki Myntri Rangbah ka Jylla (Assam bad Meghalaya) ba kin leit ban ïuhkjat ha ka thaiñ ban pyntikna ïa ka jingshngaiñ bad ban wanrah ïa ka jingsuk.
Ka Forum ka la pynpaw ruh ïa ka jingtieng ba lada ailad ïa ki pulit ka Assam ban shna ïa ka ktem kan buh ha ka jingma ïa ka jingim jong ki paidbah Pnar bad kan sa buh jingeh ruh ban weng pat ïa ki lashai lashisngi.
