Shillong, Jylliew 27
Ka Manchester City ka la pynkut noh ïa ka jingïalehkai ‘group stage’ ha ka Group G da kawei pat ka jingjop kaba khraw da kaba jop haduh 5-2 kol ïa ka Juventus ban pynskhem ïa la ka jaka ha ka kyrdan knockout jong ka FIFA Club World Cup. Ha kajuh ka por, ka Real Madrid ruh ka la jop da 3-0 kol ïa ka RB Salzburg. Baroh ar tylli ki kynhun ki la pyntikna ïa la ka jaka sha ka Kylla ba 16.
Kane ka jingïalehkai ka la long ha ka 26 tarik Jylliew 2025 ha madan Camping World Stadium, Orlando, ha Florida. Ki kol ka Manchester City la ïoh ban thep da u Jérémy Doku (9′), u Pierre Kalulu (26′ own goal), u Erling Haaland (52′), u Phil Foden (69′), bad u Savinho (75′). Katba ar kol jong ka Juventus la thep da u Teun Koopmeiners (11′) bad u Dusan Vlahovic (84′).
Ka Manchester City ka la lah ban lehkai bha bad synshar ha kane ka jingïalehkai da 65% ka bol ka tyllun bad ki, bad 11 sien ka la ïoh ban pyrshang thep kol.
U Erling Haaland u la lah ban thep ïa ka kol kaba 300 sien ha ka kam lehkai jong u na ka bynta ka kynhun bad kumjuh na ka bynta ka ri ha ka minit ba 52.
U Phil Foden uba la wan kum ‘rangïalehkai bujli u la thep ïa ka kol kaba saw ha ka minit 69.
