Shillong, Jylliew 27
U Cristiano Ronaldo u la pynkut noh ïa ki jingkynthoh shaphang ka lawei jong u da kaba soi ïa ka jingïateh soskular bathymmai kaba ar snem bad ka Al Nassr, kaba pynsah ïa u ha ka klob jong ka Saudi Arabia haduh ka samoi lyiur jong u snem 2027. Ka jingïateh soskular thymmai jong une u rangïalehkai, 40 snem ka rta, ka pynskhem ïa ka kyrdan jong u kum nongïalehkai baheh jingsiew tam ha ka pyrthei, ha kaba ki khubor ki pynpaw ba ka jingïateh soskular ka long haduh €200 million shi-snem, ryngkat bad ki khusnam kiba heh, ka bai soi, bad ka jingïoh bynta 15% ha ka klob.
U Ronaldo u la pynïasoh ïalade bad ka Al Nassr ha u bnai Nohprah 2022 hadien ba u la mih noh na ka Manchester United. Naduh katei ka por, u la thep 99 tylli ki kol ha ki 111 tylli jingïalehkai na ka bynta katei ka klob bad u la pynlong ban khring ïa ka pyrthei ban tip shaphang ka phutbol ha Saudi. Ka jingdon jong u ka la ïarap ban khring ïa kiwei pat ki khlur ïalehkai kum u Neymar bad u Benzema sha ka Saudi Pro League bad ka la pynlong ïa ka jingkiew kaba khraw ha ka jingbun ki nongkyrshan jong ka Al Nassr bad ka jingïohnong na ka kam khaïi.
Watla ka Al Nassr ka la wan ha ka kyrdan ba ar ne ba lai ha ka league naduh ba la wan pynïasoh une u ‘rangïalehkai, hynrei u la bteng ban pyni ïa ki jingïalehkai ba tbit bad paw jong u, kynthup ïa ka jingjop ïa ka Arab Club Champions Cup ha u snem 2023. Ka jingïateh soskular bathymmai jong u ka pyni ïa ka jingangnud jong u ban ïarap ïa ka Al Nassr ban ïoh kham bun ki khusnam bad ban kyntiew shuh-shuh ïa ka kam lehkai phutbol jong ka Saudi ha ka pyrthei baroh kawei.
