Shillong, Jylliew 27
U nongïalam ka UDP uba dei ruh u Myntri ka Sorkar Jylla, Bah Paul Lyngdoh, u la pynrem jur ïa ka Voice of the People Party (VPP) halor ka jingbym la pynkhreh bad ka jingbym don ïa ka jingsngewthuh hapoh ka Khasi Hills Autonomous District Council (KHADC).
Ïa kane, u Bah Paul Lyngoh u la pynpaw haba ïakren bad ki lad pathai khubor ha ka Sngi Thohdieng, ka 27 tarik u Jylliew 2025.
Haba jubab ïa ka jingkylli halor ka KHADC kaba dang shu kut shen, na ka liang u Bah Paul u la ong, kaba nyngkong eh ka dei kaba ngi hap don lypa ïa u Leader of Opposition uba tbit, u Bah Titoss Chyne uba la lah ban pynshai halor kine kiei-kiei baroh.
U Bah Paul u la bynrap da kaba ong ba kim lah ban shu ong ba ki dang pule bad ba kin hap ban peit shuwa, haba la jied, phim lah shuh ban ong ba phim pat tip ïa ka rukom treikam.
U la ong ba ki MDC kiba la jied da ki paidbah ki dei ban long kiba la tip bha ïa ki kyndon aiñ kiba peit ïa ka Council. U la ong phi la rung ha ka kam kaba dei ka rukom ban long u nongïalam, phi dei ban tip ïa ki kyndon, ki aiñ, bad ki Act jong ka Council bad ka dei ka kamram jong ki MDC ba la jied ban pule bha ïa ka Sixth Schedule bad ki aiñ bapher bapher.
U la ther tyngeh ruh haba ïadei bad ka jingbeh kam jong ka EC ba la ïalam khmat da ka VPP bad tang hadien katto-katne ka ïingbishar ka la pynsangeh shwa shipor.
“Kawei pat ka dei halor ka jingtei ïa ki khyrdop ha ka surok bah National Highway, haba ka dei ka surok kaba hap ban siew ha ki toll gate ki dei ban sngewthuh shai kdar ba katei ka surok la tei da ka NHAI kaba pynlut bad kan lum pisa ban pynmih ïa ka jinglut, kumno kiwei ki pynïeng khyrdop. Hangno kan don ki bor synshar ban ailad ïa kawei pat ka bor ban lum pisa ma ka surok kaba la pynlut bad bei pisa,” la ong u Bah Paul.
Shuh shuh u Bah Paul u la ong ba u President ka VPP u la don bynta la bun tylli ki snem ha ki seng saiñ pyrthei, u la long kum president ka HSPDP, u nongïalam ha ka UDP ban ong ba kim pat tip eiei kam lah ban long.
U la ther tyngeh da kaba ong ba phim lah ban khot briew na ki jaka bam bad na ki surok ban thep beit ha Council kum ki nongmihkhmat, kata kam lah ban pdiang.
