Shillong, Jylliew 27
U Bah Lektor Dkhar uba dei na ka shnong Khliehmyntriang, East Jaiñtia Hills bad ruh kum Nongwad RTI hapoh East Jaiñtia Hills, u la pynpaw ïa ka jingsngewnguh ïa ka Sorkar Meghalaya kaba la shimkhia ïa ka jingkyrpad jong u ban buh noh ïa ka FCI Depot ha East Jaiñtia Hills.
Ha ka 27 tarik u Jymmang, 2025, na ka liang u Bah Lektor Dkhar u la leit ban ïakynduh ïa u Myntri ba dei khmih ïa ka tnat Food Civil Supplies & Consumer Affair, Bah Comingone Ymbon da kaba ai jingthoh ba dei ban buh noh ïa ka FCI Depot ha East Jaiñtia Hills.
Na ka liang ka Sorkar Jylla lyngba u Saloni Verma, IAS, Director ka Food Civil Supplies Consumer Affairs jong ka Jylla Meghalaya, u la phah da ka jingthoh sha ka General Manager Food Corporation of India Regional Office, Meghalaya ba dei ban shna noh ïa kane ka FCI Depot ha East Jaiñtia Hills District.
U Saloni Verma u la phah ruh ïa kajuh ka jingthoh sha u Bah Lektor Dkhar bad kumjuh sha u Under Secretary ka Sorkar Jylla jong ka tnat Food Civil Supplies & Consumer Affairs, Deputy Commissioner East Jaiñtia Hills District bad sha u Myntri ka tnat Food Civil Supplies and Consumer Affairs. Kumba ka long mynta, ka East Jaiñtia Hills ka dang sah khlem ka jaka buh marbam jong ka FCI bad kane ka la buh jingeh bha ha ka liang ka jingpynpoi marbam bad ka ïoh ka kot na ka bynta ki paidbah jong ka thaiñ.
Ka jingbym don ka jaka buh mar ha ka thaiñ ka la pynlong ïa ki mar ba kongsan ban ïoh na ki jaka kiba jngai bad ka la pynlong ïa ka jingpynslem ban sam ïa ki marbam bad ka jingkiewdor ha ka leit ka wan bad ha kajuh ka por, kane ka ktah ïa ka jingdon bad jingbuhdor ïa ki marbam bad kiwei-kiwei ki jingdonkam hapoh ka rukom sam marbam paidbah ne ka PDS khamtam eh na ka bynta jong ka imlang sahlang kiba duk.
Na ka liang u Bah Lektor Dkhar u la ong ba kane ka jingbuh ïa ka FCI Depot ha East Jaiñtia Hills kan ai shibun ki jingmyntoi kiba kynthup ïa ka jingpynbha bad ka jingpynbiang marbam, kaba jingpynthikna ïa ka jingpynbiang ïa ki marbam ha ka por bad khlem da wanrah jingthut ïa ki nongshong shnong, ka jingkiew ha ka ïoh ka kot ka ban pynmih ïa ki lad kamai kiba beit bad bym beit lyngba ki jingshakri pynpoi mar, shna jingshna, bad pyntreikam.
Shuh-shuh, u Bah Lektor Dkhar u la ong ba ka PDS kaba pynkhlaiñ bad ka jingpynbha ïa ka jingtreikam bad ka jingpoi jong ka rukom sam paidbah ha ki jaka nongkyndong bad ki jaka ba jngai bad ka jingpynkhreh na ka bynta ki jingjia ba sngewsih kan pynsuk ïa ka jingïarap kaba kham kloi ha ki por ba don ki jingjia ba sngewsih ne ki jingjia ba kyrkieh da kaba don ïa ki mar ba kongsan hajan.
“Ka distrik jong ngi, da ka jingbun briew kaba nangroi bad ka jaka kaba biang bha hajan u pud u sam jong ka Assam bad ki surokbah, ka long kaba biang bha na ka bynta kum kine ki jingtei. Nalor kata, ka jingdon jong ki jaka kiba lah ban long bad ka jingdon jong ka jaka ka pynskhem shuh shuh ïa ka jinglah ban pyntreikam ïa kane ka jingtyrwa,” ong u Bah Dkhar.
U la ong ba lada don ka FCI Depots ha East Jaiñtia Hills District, kan long ka sienjam ka ban ïarap shibun ha kaba kyrshan ïa ka bha ka miat bad ka roi ka par jong ka thaiñ.
U Bah Dkhar u la ai jingïaroh ïa ka Sorkar Jylla lyngba ka jingshimkhia jong ka ban sdang noh ïa kane ka projek ha kine ki sngi ban wan bad u la ong ruh ba ka Sorkar kam dei ban shim sting ïa kane ka kam da kaba bynrap ruh ba un sa nang ïai buddien halor kane ka kam tad haduh ba kane ka FCI Depots kan da dep.
