Shillong, Jylliew 29
Ka Mawkasiang SC bad ka Mawshbuit SC ki la ïoh jingjop ha ka lympung ïalehkai 4th Division Under-20 Football League 2025 ba la pynïaid da ka Shillong Sports Associa-tion ha ka sngi Saitjaiñ.
Ha kane ka jingïakhun kaba la long ha SSA Stadium kaba ha First Ground Polo, ka Mawkasiang ka la pynliem noh ïa ka Lapalang SC da 2-1 kol na ka bynta ban bat ïa ka kyrdan ba ha khlieh jong ka Group-C.
Ha kane ka jingïa-khun, ka Mawkasiang ka la ïoh ban pynkhih jar nyngkong eh na u Kyrmenskhem Mukhim ha ka minit kaba 3. Une u rangïalehkai shakhmat u la pynbud biang ïa ka kol ba ar ha ka minit kaba 8. Hynrei ka Lapalang ka la lah ban pynphai kylla shi kol lyngba u Banjop Pohlang ha ka minit kaba 45 ha shwa ba kan mad ïa ka jingshah rem.
Lyngba kane ka jingjop ba ar, ka Mawkasiang ka la ïoh 6 point ha kaba ka la tam da 3 point ïa ka Nongthymmai, Lapalang bad ka Summit FA.
Ha kawei pat ka jingïakhun ka Mawshbuit SC ka la pynliem noh ïa ka Thynroit SC da 3-0 kol na ka bynta ban jam sha ka kyrdan ba-ar ha ka Group-A. Kane ka la wan urlong lyngba ki kol ba la thep da u Ezra Rynta-thiang ha ka minit kaba 16, kumjuh u Lawthangsang Gangte (48) bad u Lurshai Wankhar (76).
Lyngba kane ka jingjop ka Mawshbuit ka la ïoh 4 point na ki ar sien ïakhun bad duna sa 5 point ïa ka Golflinks, kaba dang lamkhmat ha kane ka group.
Ka Them Rangshken ka la ïasam mar shi point bad ka Pynthorbah SC hadien ba kim shym la lah ban thep kol haduh kaba kut jong ka jingïalehkai.
Lyngba kane ka jingïakhaid ka la pynlong ïa ka Them Rangshken ban dang bat ïa ka kyrdan ba ha khlieh ha ka Group-B ryngkat 7 point na ki lai sien ïakhun bad ka la tam da 3 point ïa ka Mawlyngad SC bad ka Lummawbah SC, kiba la wan ka kyrdan ba-ar bad balai.
