Nongpoh, Jylliew 29
Ha kawei ka jingjia ha ka janmiet jong ka Sngi U Blei, kawei ka kali Maruti Ignis kaba don ïa u registration number ML05-W-7020 ka la leit ban tynrah ïa u jingpynïakhlad (divider) jong ka surok bah National Highway 6 kaba dang hap ha ki bynta jong ka Umsning Bypass ha shnong Umkaliar kat haduh ba kan kylla khongpong bad wanrah ïa ka jingmynsaw jur ïa u nongñiah lem bad uwei pat.
Katkum ka khubor kaba la ïoh lum, la ïathuh ba katei kali ka dei kaba la shong da saw ngut shiparalok bad ka dei kaba pynher sted bha kat haduh ba u nongñiah um lah shuh ban teh lakam bad poi sha katei ka jingjia katba ar ngut kiwei pat kiba ïadon lang hapoh katei ka kali, ki la phet noh bak ïalade tang mar ïa jia katei ka jingjia.
Na ka liang jong ki pulit ka thanat Umsning tang mar ïa ïoh jingtip halor katei ka jingjia, ki la leit ban pynlong ïa ka jingtohkit bad ruh ban ïalam ïa kitei kiba mynsaw sha Umsning CHC na ka bynta ban pynïoh ïa ka jingsumar kaba kyrkieh.
Lah ban pynkynmaw ba kane ka bynta jong ka surok ne ka Umsning Bypass, ka dei ruh ka bynta kaba kum ki nongñiah kali saw shaka ne ar shaka ki ju mlien bha ban pynlong ki jaka pynher kali ne leh ‘stunt’ kaba ym dei ba ka buh jingma tang ïa ki hynrei ruh ïa kiwei ki nongleit nongwan.
