Shillong, Jylliew 29
Ki nongshong shnong jong ka West Khasi Hills District ki la pynbna paidbah lyngba ki lad pathai khubor ba kin sa pynlong da ka jingïalang paidbah ha ka 2 tarik u Nailar, 2025, ha ka por 12:00 mynsngi shaneng ha ïew Nongstoiñ, West Khasi Hills District, ha kaba ïadei bad ki jingeh ban pyntreikam ïa u Aadhaar ha katei ka thaiñ.
Na ka liang kitei ki nongshong shnong ki la pynpaw ba ki mat ba kongsan ba kin pynpaw ha katei ka jingïalang ki long ba ki paidbah jong katei ka distrik ki la ïakynduh ïa ki jingeh kiba bun namar ka jingpyntreikam jubor ïa u Aadhaar, uba la pynlong da kaba donkam khlem da burom ïa ka jingjied jong ki paidbah ne ïa ka hok jong ki kum ki nongshong shnong jong ka Ri India kaba long ka Ri Synshar Paidbah kaba laitluid.
Ki nongshong shnong ki la ong ba ka Sorkar Jylla bad ki Autonomous District Council (ADC) ki la shu sngap mynthi halor kane, khlem da kheiñ snep ïa ka sur jong ki paidbah.
Shuh shuh, ki la pynpaw ba ki jingmyntoi ba ki dei ban ïoh lyngba ka Sorkar kynthup ïa u khaw rashon na ka bynta ki longïing baduk ki la shah kyntait lut baroh tang namar bym don ïa u Aadhaar card.
“Kane ka wanrah ïa ka jingeh kaba khraw ïa ki longïing baduk kiba shaniah ha kine ki jingshakri kiba donkam. Ka jingkyntait ïa ki jingmyntoi ka dei ka jingpynkheiñ ïa ka hok jong ki nongshong shnong bad ka long kaba tyngeh khamtam ïa kito ki bym lah ban pdiang ïa u Aadhaar namar ki daw bapher-bapher ha kaba kumno shuh kin dang dei ban im hapoh kane ka pyrthei,” ong kitei ki nongshong shnong.
Na ka liang kitei ki nongshong shnong ki la khot sngewbha ruh ïa ki nongïalam jong ka Awaken India Movement (AIM) Meghalaya bad baroh ki nongshong shnong kiba sngewkhia, ban ïasnohktilang bad ki na ka bynta ka jingïalang paidbah kaba kongsan.
“Ïa kane ka jingïalang yn pynlong ban ïakren ïa ki mat kiba kongsan kiba ktah ïa ka imlang-sahlang jong ngi bad ban ïatreilang na ka bynta ka lawei kaba kham shai, kaba kham shngaiñ na ka bynta baroh,” ong kitei ki nongshong shnong.
“Ka jingdon, ka sur, bad ka jingïashim bynta jong phi ka long kaba donkam katba ngi dang pynbeit ïa ki jingeh ba ngi ïasam lang bad wad ïa ka jingkylla kaba bha. To ngin ïawan lang, ïasam jingmut, bad shim ïa ki sienjam kiba don jingmut shakhmat,” bynrap shuh-shuh ki nongshong shnong.
