Shillong, Jylliew 29
Ka kynhun ki ‘thei ïalehkai ka ri India ka la lah ban pynpaw ïa ka jingkhlaiñ bor ha ka AFC Women’s Asian Cup 2026 Qualifiers, hadien ba la lah ban pynliem noh ïa ka Timor-Leste da 4-0 kol ha ka Sngi U Blei ha 700th Anniversary Stadium kaba ha Chiang Mai.
Ka Manisha Kalyan ka la thep ar kol ha ka minit kaba 12′ & 80′, katba ïa kiwei pat la pynbud da ka Anju Tamang (58′) bad ka Lynda Kom Serto (86′).
Da kane ka jingjop, ka India mynta ka la don ha ka kyrdan ba ha khlieh duh jong ka Group-B ryngkat 6 poiñ na ar tylli ki jingïakhun, hakhmat duh ïa ka Iraq bad Thailand, ki ban sa ïakhun kham hadien. Ka jingïaknieh ïa ka kyrdan ba ha khlieh duh napdeng san tylli ki group ka dang ïaid shakhmat, hynrei ka India ka la lah ban pynpaw ïa ka jingkhlaiñ bor ha ki ar tylli jingïalehkai jong ka.
Ha kawei ka jingïalehkai kaba la dep, ka India ka la lah ban pynliem haduh 13-0 kol ïa ka Mongolia bad kane ka pyni ïa ka jingskhem jingmut jong baroh ki ‘thei ïalehkai.
Haba phai sha kane ka jingïalehkai ba ar, ka India ka la lah ban ïalehkai bha ha kaba ka la ïoh thep shi kol ha ka kylla step lyngba ka Manisha Kalyan ha ka minit kaba 12.
Kane ka kynhun ka la pynbud biang ïa ka kol kaba ar lyngba ka Anju Tamang ha ka minit kaba 58. Ka Manisha ka la pynbud biang ïa ka kol ba ar ha ka minit kaba 80. Ha shwa ban wai ka India ka la thep biang ïa ka kol kaba saw bad kaba khatduh lyngba ka Lynda Kom Serto na ka byna ban jop shisyndon.
