Shillong, Jylliew 29
Ka Khun Hynñiewtrep National Awakening Movement (KHNAM) ka la dawa na ka Sorkar Jylla ba ka dei ban sam ïa ka kaiphod jong ka Expert Committee (EC) halor ka bhah thungka-m-thungjam ne ka ‘State Reservation Policy’ sha baroh ki seng saiñ pyrthei ka Jylla.
Kum ban shu kdew hangne ba ïa ka Expert Committee la thaw ha ka 12 tarik Nailur, 2023, na ka bynta ban shong bishar biang ïa ka State Reservation Policy lyngba ka jingshim ïa ki jingai jingmut na baroh ki kynhun bapher-bapher ka Jylla.
Ka Sorkar Jylla ka la thung ïa ka Expert Committee ban shong bishar biang ïa ka Reservation Policy 1972, kaba ai bhah 40% ka kam Sorkar na ka bynta ki paid Khasi bad Jaiñtia, 40% ka bhah ka leit sha ki paid Garo bad 5% ka bhah na ka bynta kiwei-kiwei ki riewlum ka Jylla.
Katei ka Committee ka kynthup ïa u Justice (Retd) Dr Satish Chandra, Prof DV Kumar, Prof Chander Shekhar, bad Prof Subhadip Mukherjee kum ki dkhot.
Ka KHNAM lyngba u Working President, Bah Thomas Passah ka la ong ba ka Committee kaba khlieh da u Justice (Retd) MC Garg, ka la dep ban aiti ïa ka kaiphod sha ka Sorkar hadien ka jingbishar thymmai ïa ka State Reservation kaba don mynta ha Meghalaya.
U Bah Thomas u la ong ba baroh ki seng saiñ pyrthei, ki sengbhalang bad ki kynhun bapher-bapher ki la ïakynduh ïa ka Committee bad ban aiti ïa ki jingpynsngew bad ki jingai jingmut.
“Kum ka Seng ka pynpaw bad ka dawa ba ka Sorkar ka dei ban ai copy jong ka kaiphod ba la aiti da ka Committee sha baroh ki seng saiñ pyrthei khnang ba kin ïoh ban pule bad nang ai shuh shuh ïa ki jingthoh sha ka Sorkar lada donkam,” ong u Bah Thomas.
