Shillong, Jylliew 29
U Bah Process T Sawkmie, MLA barim ka Mawlai u la ong ba ka jinghiar ka Performance Grading Index (PGI) halor ka pule-dangle ka dei shibynta ka jingkhuslai jong ki nongshong shnong ka jylla Meghalaya baroh kawei.
“Ka jylla Meghalaya ha ki por kiba mynshwa ka la long kawei na ki jylla ba ki jaka pule ki long kiba bha tam hapoh ka thaiñ shatei lam-mihngi bad ki bynta ka ri India, hynrei mynta sngew synei ïa la ka jong ka jylla bad ka Shillong,” ong u Bah Process.
U Bah Process u la buh jingkylli, “Kum ki nongshong shnong kiba la pynlong ïa ka jylla Meghalaya kumne kumba ka long, hato ngin shu sngap, ngin shu ïa kdew kti, ngin shu ïa kynnoh ïa ka Sorkar kaba rim bad ka Sorkar kaba mynta ka biang mo?.”
“Kum ki nongshong shnong kiba don ka jingkitkhlieh ïa la ka jylla ngin kmen haba ngi ïohi ba ka kiew bad ngin khuslai haba ïohi ba ka hiar,” bynrap u Bah Process.
U la ong ruh ba kane ka dei ka por ba ki educationist ne ki ‘riewshemphang ha ka pule-dangle jong ka jylla kin ïarap lem ban ai jingmut sha ka Sorkar ban kyntiew pat ïa ka pule-dangle hapoh ka jylla.
“Ngi don ka jingkyrmen ba lada ki ‘riewshemphang ki ïamir jingmut lang kawei ban kyntiew ïa ka pule-dangle ha ka jylla, sa shisien ka nam bad ka burom ka Meghalaya kan sa paw biang,” pynkut u Bah Process.
