Shillong, Jylliew 29
U Myntri Rangbahduh ka ri, Narendra Modi, ha ka bynta kaba 123 jong ka ‘Mann Ki Baat’ kaba la long ha ka Sngi U Blei, u la pyrto ïa ka jingriewspah jong ka India ha ki kam shna jingshna, ki kam saiñdur bad ka sap tynrai da kaba kdew sha ka ryndia ne ‘Eri Silk’ kaba kyrpang jong ka Meghalaya, kaba dang shen ka la ïoh ïa ka jingithuh ba paw jong ka ‘Geographical Indication (GI) Tag’.
Da kaba ithuh ïa ka riti-dustur ba riewspah jong ka India ha ki kam saiñdur, ki kam shna jingshna, bad ki jingtbit tynrai, u Myntri Rangbahduh u la batai kumno kawei-pa-kawei ka thaiñ jong ka ri ka don ïa la ka jong ka jinglong bad ka pateng lyngba ki mar tynrai jong ka ri.
Napdeng kine, ka ‘Eri Silk’ na Meghalaya ka paw kum ka dak jong ka jingpynneh-pynsah, ka riti-dustur, bad ka jingtrei kti.
“Ka ‘Eri Silk’ kam dei tang ka jaiñ, ka dei ka pateng jong ka Meghalaya, kaba la pynneh-pynsah da ka jingieid bad kyntiew katba dang ïaid ki pateng, khamtam da ka jaidbynriew Khasi,” la ong u Myntri Rangbahduh.
U la kdew ïa ka rukom pynmih ba kyrpang jong ka, kaba long ka bym ktah ïa ka mariang, kaba la pynlong ïa ka ban ïoh ïa ka nam ‘Ahimsa Silk’, namar ba ki khñiang kim ju shah ktah ha kaba sei ïa u ksai.
U la bynrap, “Mynta, ka jingdawa ïa kum kine ki mar ka kiew sted ha ka pyrthei, ki bym don ka jingpynthut bad kim don kano-kano ka jingktah kaba sniew ïa ka mariang, kumta, ka ‘Eri Silk’ jong ka Meghalaya ka dei ka mar kaba paka na bynta ki ïew ha kylleng ka pyrthei.”
U Myntri Rangbahduh u la ïaroh ïa ka jingdawa kaba nang kiew ha ka pyrthei ïa ki mar kiba ïadei bad ka mariang bad kiba lah ban pynneh-pynsah bad u la pynpaw ïa ka jingngeit skhem ba ka ‘Eri Silk’ ka long kaba biang bha ban pynbiang ïa kane ka jingdawa.
“Kane ka ryndia ka pynlong ïa phi ban syiad ha ka por tlang bad tngen ha ka por lyiur, kaba pynlong ïa ka ban long kaba biang bha na bynta ki jait suiñ bneng bapher-bapher bad kane ka kyntiew ïa ka jingïaid ïew jong ka ha ki ïew hapoh bad shabar ka ri,” u la ong.
U Modi u la ïaroh ruh ïa ki kynthei ka Meghalaya kiba mihkhmat da kaba thaw ïa ki Self Help Group ban kyntiew ïa ka jingpynmih, ban pynneh-pynsah ïa ka kam, bad ban pynmih ïa ki lad kamai kiba lah ban neh.
Ha kajuh ka por, u la ai khublei ïa ki paidbah ka Meghalaya halor kane ka jingjop kaba phylla bad u la pynshlur ïa ki nongshong-shnong ha kylleng ka ri India ban kyrshan ïa kum kine ki mar tynrai.
Da kaba kyntu ïa ka ri ban pdiang ïa ki kam Khadi, ki kam shna kti, u Myntri Rangbahduh u la pynpaw biang ïa ka mynsiem jong ka ‘Vocal for Local’ bad ka ‘Atmanirbhar Bharat Abhiyan’.
“Lada ki nongthied ki thied tang ïa ki mar ba la shna ha India bad ki nongkhaïi ki die tang ïa ki mar ba la shna ha India, kata ka jingshaniah ha lade jong ka India kan ïoh ïa ka bor ka bym lah ban khanglad,” u la ong.
Ka bynta kaba 123 jong ka ‘Mann Ki Baat’ ka dang bteng ban pynpaw ïa ka jinglong tynrai jong ka India kaba shaniah ha lade bad kaba don tynrai ha ka kolshor, kaba pynpaw ïa ki khana shaphang ka jingsarong, ka jingïaishah, bad ka jingkiew shaphrang na ki bynta bapher-bapher jong ka ri.
