Shillong, Jylliew 29
Ka Executive Committee jong ka Khasi Hills Autonomous District Council (KHADC) ka la pynkiew haduh T.5.25 lak ka bai lum khajna sha ki khyrdop (Toll Gate) ha Majai, East Khasi Hills District haba ka aiwai sha ki ‘riewshimet.
Katkum ka jingïathuh u Executive Member, Bah Winston Tony Lyngdoh uba peit ïa ka tnat Khaïi ha dorbar KHADC ba dang shu dep, u la ïathuh ba mynshwa ïa ka khyrdop lum khajna (Toll Gate) ïa ki kali kiba kit mar la shu ai wai tang T.1.50 lak hynrei mynta ka KHADC ka la aiwai haduh T.5.25 lak sha u Bah Banshanlang Lyng-shkor.
U la ïathuh ba ha khyrdop kaba don ha Umlangmar Nongspung Sohïong, East Khasi Hills district mynshwa la ju ai wai tang T.1.20 lak hynrei mynta u snem la ai wai haduh T.1.50 lak sha u Bah Stronglystone Shangpliang.
Ha Umïam Industrial Area, Ribhoi District mynshwa la aiwai tang T.1 lak hynrei mynta la wai haduh T.3 lak ha u Bah Watson Kharkrang.
Ha Umsiang, Ribhoi District mynshwa la aiwai tang T.1 lak hynrei mynta la aiwai T.1.80 lak ha u Bah Iarlang Mukhim. Ha Lumdiengngan, Ribhoi District mynshwa la aiwai T.1.20 lak mynta la aiwai T.1.50 lak ha Bah Rymphang Wansai.
Ha Killing, Ribhoi District la aiwai mynshwa T.90 hajar bad mynta la ai wai T.1.50 lak ha u Bah Radman Kharkongor. Ha Borosra, South West Khasi Hills mynshwa la aiwai T.35 hajar mynta la aiwai T.60 hajar ha u Bah Risingstar Marwein.
Ha Cheragoan, South West Khasi Hills mynshwa la aiwai T.35 hajar bad mynta la ai wai T.60 hajar. Ha Athiabari, West Khasi Hills District mynshwa la ai T.1 lak bad mynta la aiwai T.1.50 lak ha ka Kong Sweety Marysha Kharlyngdoh. Ha Bagli, West Khasi Hills mynshwa la aiwai T.1.20 lak bad mynta la aiwai T.1.50 lak ha u Bah Banribor Lyngdoh.
