Shillong, Jylliew 29
Ka Meghalaya and Greater Shillong Progre-ssive Hawkers and Street Vendors Association (MGSPHSVA) kum ka seng ki nongdie madan ka la pynpaw ïa ka jingpyrshah kaba jur halor ka jingleh donbor bad ka jingshim rai marwei jong ka Municipal bad tnat Urban ha ka ban thaw ïa ki jaka shong jong ki nongdie madan ha ka bynta ba shapoh jong ka MUDA, khlem da wanrah ha ka jingïalang jong ka Provisional Town Vending Committee (PTVC) bad khlem ka jingïamynjur lang jong ki dkhot ka PTVC.
Ka seng ka la ong ruh ba kane ka jingrai marwei jong ka Municipal bad tnat Urban ka long ka jingleh be-aiñ.
Ka Seng kan ym shah da lei-lei ruh ban weng ne pynkynriah jubor ïa ki nongdie madan na Khyndai Lad sha khrum ka MUDA, hynrei ka Municipal bad tnat Urban ki dei ban pynbeit shwa ïa ki kynrum-kynram bad ka dei ban pyndam shwa ïa ki licence kiba ki la ai sha ki briew ki bym dei ki nongdie madan.
Kane ka jingshim rai da ka seng ki nongdie madan ban pyrshah ïa ka jingthmu ka sorkar ban pynkynriah noh na Khyndai Lad, ka dei namar ba kim hun ïa ka jaka ba la shna ha khrum ka MUDA, namar ki ong ba ka dei ka jaka kaba khapngiah bad ka bym bit ban shong.
Ha ka kyrwoh ba la phah, ka seng ki nongdie madan ka la pynpaw bad pynkynmaw ba naduh u snem 2016 ka la ïakhun ban pyntreikam ïa ka aiñ Street Vendors (Protection of Livelihood and Regulation) Act 2014, bad ka angnud ba ïa kane ka aiñ dei ban pyntreikam thik-pa-thik katkum ki kyndon bad ki rule. Kumta hadien ba ka Meghalaya High Court ka la ai ïa ka rai ba khatduh bad bthah ïa ka Sorkar Meghalaya ban pyntreikam ïa ka Aiñ ha u snem 2022, ka seng ki nongdie madan ka MGSPHSVA ka la ïa treikam lang bad ki bor ne tnat sorkar na ka bynta ban ïada ïa ki hok jong ki nongdie madan katkum ka aiñ.
Ka seng ka la ïashim bynta ruh ha ka Provisional Town Vending Committee. Nangta ka la ujor pyrshah ïa ki bym dei hok ki nongdie madan kiba ïoh Vending Licence bad ka la ïeng ban dawa ryngkat bad ki nongdie madan kiba shisha kiba khlem ïoh ïa ka Licence.
Ka jingïashim bynta jong ka MGSPHSVA ha ka Provisional Town Vending Committee ka long kaba shai kdar ba kane ka jingpynbeit kam pat dei kaba kut, hynrei ka dei tang ka jingpynkhreh lypa haduh kata ka sngi ba ka Sorkar kan thaw ïa ka Town Vending Committee kaba pura ka ban sa trei ïa ka kam ban jurip bniah ïa ki ïew tynrai, ki ïew long hi, nangta kan kheiñ jingkheiñ katno ngut ki nongdie madan kin shong die jingdie katkum ka jingdon briew bad kan kdew ïa ki jaka ba kin shong die jingdie bad kiwei kiwei de ki kam ba la pruid dak ha ka aiñ.
“Na ka por sha ka por ka Seng ka la ju phah ïa ki jingujor ban kdew ïa ki jingduna bad jingdkoh ha ka jingtreikam jong ka Provisional Town Vending Committee (PTVC). Kum ka nuksa, ka PTVC kam shym lah ban pyntreikam ïa ka Digital Survey kaba la khmih lynti ban pyntreikam katkum ka juk stad technology khnang ban wanrah ïa ka jingkhuid bad jingsuba ha ka jingpyntreikam ïa ka aiñ.”
Ka MGSPHSVA kam don kano-kano ka jingthmu ban pynthut ne pynwit ïa ka jingpyntreikam ïa ka aiñ hynrei ka angnud hir-hir ba ka aiñ kan treikam bad ba yn lah ban pynbeit ïa ka kam jong ki nongdie madan kaba la sah teng mynta la jan shiphew snem. Kumba ka ju long, ka Seng ka kloi ban ïatreilang bad ka Sorkar, hynrei ka dawa ruh ba ka Sorkar lyngba ka Municipal bad Urban Department ba kin pynbeit shwa ïa ki kynrum-kynram bad ki jingkynriang ha ka rukom pyntreikam ïa ka aiñ kumba ka paw ha ki rai ba marwei shimet jong ka Municipal bad tnat Urban.
Ka Seng ka la pynpaw ruh ba kan ym pdiang ïa kine ki kam be-aiñ kiba buh jingeh ïa ki nongdie madan bad kan ym shah ba ki bor Sorkar kin khñoit beiñ ïa ki nongdie madan bad ban ïuhroit ïa ki hok jong ki. Ka Seng kan ym shah ruh ba ki bor Sorkar kin pyndonkam bakla ïa ka aiñ.
Ka MGSPHSVA lyngba kane ka kyrwoh ka pynkynmaw ruh ïa ka PTVC, ka Municipal bad tnat Urban ba ka Seng ka la phah ïa ki shithi bad ki jingai jingmut halor kumno ban pyndonkam bad pynitynnat ïa ki jaka shong die jingdie jong ki nongdie madan.
Ka MGSPHSVA ka la pynkhreh ruh ban buh hakhmat ka PTVC ïa ka dur ka dar jong ki jaka shong die jingdie kiba khuid, kiba kylluid bad kiba itynnat. Ka seng ka la mynjur ruh ban kynriah sha ki jaka kiba biang bad ïa kane yn lah ban leh hadien ka jingïakren, ka jingïapynbeit bad jingïaralang ha ka PTVC.
Ha kajuh ka por pat ka Sorkar lyngba ka tnat Municipal bad tnat Urban ki dei ban pynbeit shwa ïa ki jingduna bad ki kynrum-kynram kumba ka Seng ka la kdew ha ki shithi bad jingujor jong ka.
Ka Seng ka la pynpaw ba kan ym shah da lei-lei ruh ban weng ne pynkynriah jubor ïa ki nongdie madan na Khyndai Lad, hynrei ka Municipal bad tnat Urban ki dei ban pynbeit shwa ïa ki kynrum-kynram bad ka dei ban pyndam shwa ïa ki Licence kiba ki la ai sha ki briew ki bym dei ki nongdie madan.
Shuh shuh, ka Seng ka dawa ba dei ban don ka jingïapyrkhat bad jingïashim bynta lang da baroh ha kaba thaw ïa ki jaka die jingdie jong ki nongdie madan. Bad ka long ruh kaba kongsan ban shim nongmuna na kiwei ki Sorbah kum na Delhi, Sikkim, Bangalore bad kiwei de ki jaka khnang ban lah shna ïa ki jaka die jingdie kiba khuid, kiba kylluid, kiba itynnat bad kiba ïaid ïew.
Kane ka jingpyrkhat lang kan wanrah ruh ka jingmyntoi bad jingbha ym tang ïa ki nongdie madan hynrei ïa baroh ki nongshong shnong, da kaba ka Seng ka khot ruh ïa ki nongshong shnong, ki nongput nongtem, ki architect, ki barikor, ki nongdro bad kiwei ban ïa ai jingmut lem.
