Shillong, Jylliew 29
Ki pulit ka Special Investigation Team (SIT) ka Meghalaya ha ka Sngi U Blei ki la ïoh ban kurup noh ïa ka ksiar kaba dei jong ka Sonam bad u Raja Raghuvanshi na kawei ka ïing paki (flat) jong u Shilom James kaba don ha Ratlam District hapoh Madhya Pradesh.
Ha ka kyrwoh khubor ba la pyllait da u Superintendent of Police (SP) ka East Khasi Hills, Bah Vivek Syiem, u la ong ba ïa kane ka kynhun ka SIT la ïalam da u SI Anthony Khongsit bad u SI Karan Pachua bad ba la ïarap da ki ophisar bad pulit jong ka thanat Alkapuri.
U SP u la ong ba ha ka jingkhynra, kane ka kynhun ka la ïoh ruh ban kurup ïa ka laptop, pendrive bad ki kot donkam na katei ka ïing paki jong u Shilom James bad bynrap ba kine ki tiar kiba la ïoh ban kurup, la ngeit ba kin long ki sakhi kiba donkam bha ha kane ka jingtohkit kaba dang ïaid shakhmat.
Lah ban pynkynmaw ba ha ka 26 tarik mynta u bnai, ka ïingbishar ka la aibor ban set hynriew sngi ha along ki pulit ïa u Shilom James bad kiwei ar ngut ba kynthup ïa u Lokendra Singh Tomar na Gwalior, Madhya Pradesh, uba dei ruh u trai jong ka ïing ba sah wai ka Sonam Raghuvanshi ha Dewas Naka bad ruh u Balia Ahirwar, uba dei u nongap khyrdop ha ka complex kaba don ka ïing paki jong u Shilome James halor ka jingkynnoh donkti ban pynjot ïa ki sakhi satar kiba ïadei bad ka jingshah pynïap jong u Raja Raghuvanshi uba na Indore, Madhya Pradesh.
