Imphal, Jylliew:
Ka seng bhalang kaba don ha Manipur ka la kyntu ïa ki nongthaw aiñ jong ka Kuki bad Meitei ban kiew halor ka saiñ pyrthei bad ban shim ïa ka jingkitkhlieh ban pynbeit ïa ka jingïakynad hapdeng ki jaitbynriew ha ka jylla.
Ha ka jingpynbna, ka Council ka la ong, “Ka jingïakynad hapdeng ki jaitbynriew Meitei bad ki jaitbynriew Kuki ka la neh la palat ar snem ar bnai, ha kaba ki jingim bym lah kheiñ ki la shah pynthut, ki longïing ki la shah pynpra, bad ki jaitbynriew ki la ïakhlad. Wat la ka la pyrshang bunsien, ka sorkar pdeng kam shym la lah ban wanrah ïa ka jingpynbeit kaba la kwah.”
Ka World Meetei Council ka la kyrpad ïa ki nongthaw aiñ jong ka Kuki bad ka Meitei “ban kiew halor ka sain pyrthei bad ban shim ïa ka jinglong trai halor ka jingeh”, bad ong ba ki paidbah ki mad ïa ka jingeh kaba khraw tam.
“Halor baroh, ka bynta kaba kongsan tam mynta ka shong ha ki MLA jong ngi. Phi don ïa ka jingbthah jong u paidbah. Phi dei ban leh. Ki MLA Meitei bad Kuki ki dei ban ïatreilang iwei ïa iwei pat, ym ban ap ïa ka jingwan rung nabar. Phi dei ban ïalam – namar lada ki nongmihkhmat ba la jied jong ngi kim leh, te mano ban leh?” la ong ka seng Meitei.
Ki la don palat 260 ngut ki briew ki la ïap bad da ki hajar ngut ki la sah khlem ïing khlem sem ha ka jingïakynad hapdeng ki kynhun Meitei bad ki kynhun Kuki-Zo naduh u bnai Jymmang 2023.
Ka sorkar pdeng ka la pynjari ha ka 13 tarik u Rymphang ïa ka jingsynshar President ha Manipur hadien ba u Myntri Rangbah ka jylla u N Biren Singh u la iehnoh ïa ka kam. Ka Assembly ha ka jylla, kaba dei ban kut ka samoi treikam haduh u 2027, ka la hap ban shah pynsangeh treikam.
