Washington, Jylliew:
U President ka United States, Donald Trump, ha kane ka por u la pynpaw ba u kyrmen skhem ba ka jingsangeh siat hapdeng ka jingïakynad ka Israel bad ka Hamas ha Gaza kan urlong noh hapoh jong kane ka taïew ban wan.
U Trump haba ai jingkren ha ka jingïalang hapoh Oval Office ba la rakhe ïa ka jingïateh soskular hapdeng ka Congo bad ka Rwanda, u la ong ba u ngeit skhem ruh ba ka jingsangeh ïasiat ka la jan. U la ong ba u dang shu ïakren bad katto-katne ngut ki briew kiba mynjur ban iatreilang ha ka ban pyrshang ban poi sha ka jingsangeh jong ka jingïaleh pyrshah hapdeng ka Israel bad ka Hamas hapoh ka nongbah Gaza jong ka Palestine.
Ka Hamas ka la ong ba ka kloi ban pyllait ia ki nongshah rahbor kiba dang sah ha Gaza lada ka Israel ka wanrah ia ka jingkular ban sangeh bad pynkut noh ia ka thma. Katba, na ka liang ka Israel pat ka la ong ba ka lah ban kut noh tang lada ka Hamas ka ailad ban pynduh bad pynpra noh ia ki tiar bad ki shlem jong ka kaba na ka liang ka Hamas ka la kyntait ban pyndem ne ban aiti noh ia ka bor synshar ha ka tnat shipai jong ka Israel.
Ka thma hapdeng ka Israel bad ka Hamas hapoh ka nongbah Gaza, ka la sdang, naduh ba ki lehnoh Hamas ki la leit hiar thma bad leit thombor sha ki bynta khappud jong ka Israel ha ka 7 tarik u Risaw 2023, ha kaba ki la pyniap dusmon ia palat 1,200 ngut ki briew bad ki la rahbor ruh ia 251 ngut ki briew na Israel, katkum ka jingbuh jingkheiñ jong ka Israel.
Ka tnat ka koit ka khiah jong ka Gaza, ka ong ba ka jinghiar thma jong ki shipai jong ka Israel, hadien ka 7 tarik u Risaw, ka la pyniap ia palat 56,000 ngut ki nong Palestine. Ka jingshah thombor ka la wanrah ruh ïa ka jingeh ha ka jingkyrduh bam, ka la pynkynriah ïa ki nongshong shnong jong ka Gaza baroh kawei hapoh ka ri bad ka la pynlong ïa ki jingkynnoh pynïap pathar ha ka ïingbishar jong ka pyrthei bad ïa ki kam runar ha ka thma ha ka ïingbishar jong ka pyrthei. Ka Israel ka kyntait ia ki jingkynnoh.
Ka jingsngewtynnad ban pynbeit ïa ka jingïakynad ha Gaza ka la nang kiew stet hadien ka jingbthei bom jong ka U.S. bad ka Israel ïa ki jaka shna nuclear jong ka Iran. Ka jingsangeh thma ia ka jingialeh kaba 12 sngi hapdeng ka Israel bad ka Iran ka la sdang treikam ha kaba sdang jong kane ka taiew.
“Nga tharai ba ka long kaba jan. Nga shu iakren bad katto katne ngut ki briew kiba donkti,” la ong u Trump. “Ngi pyrkhat ba hapoh ka taiew ban wan ngin sa ioh ia ka jingsangeh thma.”
Hynrei um shym la pynshai pat ïano ba u thew, hynrei u la ïathuh ha ki nongthoh khubor ba u ju ïakynduh jan man ka sngi bad u Myntri Rangbahduh jong ka Israel, u Benjamin Netanyahu, ha ka por ba don ka jingïakynad hapdeng ka Israel bad ka Iran.
