Shillong, Jylliew 29
Ka Chelsea ka la long ka kynhun kaba nyngkong eh na England ban jam sah ka quarter final ha ka FIFA Club World Cup 2025, hadien ba ka la lah ban pynliem noh ïa ka kynhun shiphew ngut rangïalehkai ka Benfica da 4-1 kol hadien ka extra time ha North Carolina.
U Reece James u la thep ïa ka kol nyngkong jong ka jingïalehkai ha ka minit kaba 64 ha ka sngi Saitjaiñ lyngba ka free kick.
Hynrei u Angel Di Maria u la lah ban pynïakhaid san minit shwa ban wai lyngba ka penalty hadien ka jingbakla pyndei da ka kti na u Malo Gusto.
Dei lyngba ka extra time ba u Christopher Nkunku, Pedro Neto bad u Kiernan Dewsbury-Hall kiba la lah ban pynurlong ïa ka Chelsea ba kan pynkhreh na ka bynta kan ïakynduh pyrshah ïa ka Palmeiras ha ka quarter final. Ka Palmeiras ka la lah ban pynliem ïa ka Botafogo da 1-0 kol ha kawei pat ka jingïakhun pre quarter final.
Ka jingmih ka long kaba duna tam kaba ka Chelsea ka dei hok ban ïoh ïa ka jingjop lyngba ka jinglah ban ïalehkai bha naduh kaba sdang haduh kaba kut.
Kane ka jingïalehkai ka la long kaba jlan bha ha kaba la hap ban pynkynriah ïa ki rangïalehkai na madan ha Bank Of America Stadium kaba ha Charlotte da u rephri namar ka jingtied jan u pyrthat bad ka leilieh.
Ka jingpynslem ka la neh haduh ar kynta, wat la ka dangsah sa tang saw minit ban ïalehkai haba ki nongïalehkai ki la mih noh na madan. Ki nongïalehkai jong ka Chelsea ki la sngewsih shibun eh ïa ka rai ban pynsangeh ïa ka jingïalehkai kaba la jan artad ban poi sha kaba kut.
Ka jingshit kaba jur ka long kaba kham pher mynta u snem ha kaba ka la buh jingeh na ka bynta ki jingïalehkai jong kane ka lympung ha ka ri America ha ka por lyiur ban wan.
Ka dei ka sien kaba hynriew ba ka jingïalehkai jong ka Club World Cup ka la shah pynsangeh namar ka jingsniew ka suiñbneng.
Ki kyndon jingïada na ka bynta ki paidbah ha US ki bthah ba ïa ki jingïalehkai shabar dei ban pynsangeh noh ym duna ïa ka 30 minit haba la ïohsngew ïa ka jingthaba ka leilieh bad ka jingtied u pyrthat.
Wat hapdeng ka jingïalehkai bha da baroh ar tylli ki kynhun, hynrei kim shym la lah ban thep kol haduh kaba kut jong ka kylla step. Dei ha ka kylla miet ba ka Chelsea ka la ïoh ban pynkhih jar nyngkong eh lyngba u Reece James ha ka minit kaba 64.
Hashwa ban wai ka Benfica ka la hap ban ïalehkai sa tang shiphew ngut na ka daw ba u Gianluca Prestianni, hynrei u Di Maria u la lah ban pynïakhaid kylla ha ka minit kaba 90+5.
Hapdeng kane ka jingïakhaid ka la pyrshang ban ïakhun tyngeh ha ka extra time bad ka la ïoh ban thep biang sa lai kol lyngba u Christopher Nkunku (108), Pedro Neto (114) bad u Kiernan Dewsbury-Hall (117) na ka bynta ban khur syndon ïa ka jingjop.
