Guwahati, Jylliew 29
Ki nongshong shnong kiba sah ha shilynter khappud ka Assam bad Meghalaya ki la pynjur ïa ka jingpyrshah halor ka jingthmu ban tei ïa ka dam um ha ka Wah Kulsi, ka jingthmu ba la kyrshan lang da u Myntri Rangbah ka Jylla Assam u Himanta Biswa Sarma bad u Myntri Rangbah ka Jylla Meghalaya u Conrad Sangma.
Ka Assam bad Megh-alaya Joint Resistance Committee ki la khot ïa ka jingïalang jong ki nong- mihkhmat ha ka community hall ha Ukiam ha ka Sngi Thohdieng na ka bynta kumno ban ïaid shakhmat ha ka jingïakhun ka jong ki ban pyrshah ïa katei ka jingthmu.
Ka Rajani Boro kaba dei ka Social Activist ka la pynïaid ïa ka jingïalang, ha kaba ki dkhot jong ka komiti ki la batai ïa ki jingeh ha ka mariang bad ka imlang-sahlang kiba ïadei bad ka projek dam.
U Maniram Rabha uba dei secretary jong ka Assam Unit jong katei ka komiti, u la batai shuh shuh ïa ki jingthmu jong katei ka jingïalang. U la ban jur ïa ka jingdonkam kyrkieh ban pynlong ïa ki jingpynsngewthuh paidbah bad ki jingïakhih ban pyntip bad pynkhih ïa ki nongshong shnong.
“Ka dam Kulsi ka lah ban wanrah ïa ka jingma kaba khraw ïa ka mariang bad ka jingim ba man ka sngi ka jong ngi. Ka long kaba donkam eh ba ngin ïatylli bad hikai ïa ki briew shaphang kaei kaba don ha ka jingma,” u la ong.
Ha katei ka jingïalang, u Nandalal Rabha u la khot ruh ïa ka jingïatreilang kaba kham khlaiñ. “Tang ka liang kaba kut jingmut bad kaba ïatylli kawei kaba lah ban pynbor ïa ka Sorkar ban pyrkhat biang ïa kane ka projek. Ngi dei ban shaniah ha ki sengbhalang, ym ha ki seng saiñ pyrthei, ban ïalam ïa kane ka jingïakhih,” u la ban jur.
U Bah Albert Nonglai, President jong ka Meghalaya Unit, u la pynbna ïa ka rai jong ka komiti ban aiti ïa ka jingthoh ba pura sha u Myntri Rangbah ka Jylla u Conrad Sangma.
Ki kot ki sla ban aiti kin kyntu ïa ka Sorkar ban pynduh noh ïa ka projek dam bad kan batai ïa ka jingktah kaba lah ban mih na ka mariang bad ka imlang-sahlang, kynthup ïa ka jingshah pynkynriah jaka jong ki jaidbynriew bad ka jingduh noh ïa ki jingthaw ba im.
Ka Chairperson ka Rajani Boro ka la pynpaw ïa ka jingsngewkhia kaba jur kumno kane ka dam kan ktah ïa ka jingim jong ki nongshong shnong. Ka la kdew ba ki nongrep, ki nongtong dohkha, bad ki nongkhaïi rit ha ka thaiñ kin sa ïakynduh ïa ka jingma kaba khraw tam.
Ka Rajani Boro ka la maham ruh ïa ka jinglong-jingman jong ka jaka, da kaba kdew ïa ka pung Chandubi kaba don hajan, kaba la mih ha ka por ba khynñiuh jumai ha u snem 1897, kum ka daw ban pyrkhat biang ïa kum kane ka projek pynroi kaba heh.
Kiwei pat kiba la ïadonlang ha kane ka jingïalang ki kynthup ïa u Kaifa Rabha, u Biswajit Rabha, u Jagdish Rabha, u Grateful Sonhom, u Kumar Marak, bad u Thiodas Marak.
Ka komiti ka la rai ruh da kawei ka jingmut ban pynjur ïa ki jingïakhih jong ki lyngba ki jingïakhih kiba bun jait, da kaba pynksan bha ban pynkhih ïa ki kynthei bad ki samla.
Wat hapdeng ki jingïalang paidbah bunsien bad ki jingpynsngewthuh paidbah, ki nongshong shnong ki la pynpaw ïa ka jingsngewsih ba ki nongmihkhmat ba la jied, kum u MLA ka Chhaygaon u Rekibuddin Ahmed, u dkhot treikam jong ka RHAC u Tonkeswar Rabha, bad u Myntri Rangbah ka Jylla Meghalaya u Conrad Sangma, kim pat lah ban leit jngoh ïa ki jaka ba shah ktah.
