Shillong, Jylliew 29
U khlur ïakura barim ka Jylla, Johny Nongrum, u la lah ban pynliem noh ïa u Anurag Singh ha ka Shillong Cage Fighting Championship (SCFC) bad ban shongthait noh shi syndon na ka jingïalehkai Mixed Martial Arts (MMA).
U Anurag u dei u khlur ïalehkai uba la khur ïa ka takma ksiar ha ka MMA National Championship 2021 & 2022, hynrei u la mad ïa katei ka jingshah rem ha ka miet jong ka sngi Saitjaiñ ha Lariti Multipurpose Theatre, Mawkasiang, New Shillong.
Kane ka jingrai shong-thait noh u Johny ka long hadien ba u la shim bynta 100 sien ha ki lympung ïalehkai MMA kiba la long ha kylleng jong ka ri bad wat shabar ri kumjuh. Ha kane ka jingïaid lynti kum u rangïalehkai, u Johny u la jop 88 sien bad shah rem 12 sien.
Haba phai sha ka jingïakhun naduh kaba sdang, baroh ar ngut ki rangïalehkai kiba la lah ban pynpaw ïa ka jingtbit ban pyni ïa la ki sap. Ha kaba nyngkong u Johnny u la bakla ha kaba u la kyllon ha madan, hynrei um shym la ailad ban shah rem.
Hapdeng kane ka jingïakhun kaba khatduh bad kaba itynnad kaba la pyndap hi smam ïa ka hall jong ka Lariti Multipur-pose Theatre, u Anurag u la kyllon hapdeng ka jingthait bad dei hangne ba u Johny u la ïoh ïa ka kabu kaba biang ban kura bunsien ïa utei u rangïa-lehkai ka liang pyrshah. Namar ka jingshah kura bunsien na ki bynta jong ka durkhmat, ka la pynlong ïa u rephri ban pynsangeh noh ïa ka jingïalehkai bad dei hangne ba u Johny u la ïoh shisyndon ïa ka jingjop.
Wat lada u la pynbna ban shongthait noh na katei ka jingïalehkai, hynrei u Johny u la pynpaw ba u don ka jingangnud ban ïadon bynta lang kum u dkhot ka MMA na ka bynta ban ïasam lem ïa ki buit ïalehkai sha kiwei pat ki nongïalehkai kiba don ïa ka jingthrang bad jingangnud ba kin nangkiew shaphrang ha ka kam ïalehkai.
