Shillong, Jylliew 29
Uwei u briew bym lah ban ithuh na ka shnong Bakur ha West Jaiñtia Hills, la kynnoh ba u la hylla bad pynwit ïa ki shipai Border Security Force (BSF) katba ki dang trei ïa la ka kam.
Katkum ka khubor na ki pulit la ong ba u Coy Commander, E-Coy, 4th Bn., BSF, BOP Dawki ha West Jaiñtia Hills u la ai ka jingujor ba ha ka janmiet jong ka 23 bad 24 tarik mynta u bnai, uwei u briew bym lah ban ithuh na ka shnong Bakur u la hylla bad pynwit ïa ki shipai BSF ban pyndep ïa ki kam lajong, bad ruh khanglad ïa ki ban rung hapoh ki bynta jong ka ïew shnong.
Shuh shuh la ong ba ym tang katne, hynrei na ka liang jong une u briew u la pyrshang ruh ban knieh ïa ka mobile phone jong uwei na ki shipai BSF, uba dang ring dur ïa kane ka jingjia baroh.
