Agartala, Jylliew:
Ha ka sngi ba la rakhe ïa ka sngi ban pyrshah ïa ka jingdih drok bad ka jingkhaïi be-aiñ, u Myntri Rangbah ka Tripura u Manik Saha u la pynsawa ïa ka jingmaham kaba tyngeh pyrshah ïa ki nongkhaii drok, da kaba pynbna ïa ka “thma pyrshah ïa u drok” bad pynpaw ïa ka jinglong rit paid jong ka Tripura kum ka lynti khaïi namar ka jingjan jong ka sha u pud u sam jong ka Bangladesh.
Ha ka por ba don ka jingïalang ba la pynlong da ka Narcotics Control Bureau, Tripura Zonal Unit, u Myntri Rangbah u la pynher lama ruh ïa ka jingïaid paidbah da ki thuk thuk bad u la leit ruh sha ka jingïalang ai snam ba la pynlong ban rakhe ïa kane ka sngi.
“Ki nongkhaïi drok ki pyndonkam ïa ka Tripura kum ka lynti ïaid. Ka jingkwah brai ka pynlong ïa kane ka jingkhaïi beaiñ, hynrei ki khun jong ngi ki dei kiba mad jingeh. Dei ka snam jong ki kaba kane ka jingma ka pynsniew,” la ong u Saha.
Ban ïaleh pyrshah ïa kane ka jingeh, ka sorkar jylla ka la pynbna ban buh ïa ki jaka pynduh jingdih drok ha baroh 8 tylli ki distrik, ha kaba la mang pisa T.2 klur na ka bynta kawei pa kawei.
Ka Ministry of Development of North Eastern Region (DoNER) ka la mynjur T.198 klur na ka bynta kane ka jingthmu, kaba kynthup ruh ïa ka jaka sumar kaba thymmai ha Agartala. Ki bor pynïaid ki la dep ban pynlong ïa ka jingbuh nongrim ïa kane ka projek.
Da kaba pynksan ïa ka jingïarap kloi, u Saha u la maham shaphang ki jingma ha ka koit ka khiah kiba ki nongdih drok da kaba injek ki ïakynduh, da kaba kdew ba ka jingsumar kloi ka lah ban pynduna ïa ka jingbun ki khñiang jingpang HIV bad ban ïada na ka jingkiew sha ka jingpang AIDS.
U la pynpaw ruh ba ka sorkar kan pyrkhing bha ïa ki jaka pynduh jingdih buaid jong ki riew shimet kiba la don lypa hapoh ki kyndon kiba thymmai.
“Ngin pyntreikam ïa ki kyndon ban buddien ïa ki jaka treikam jong ki riew shimet. Ki Myntri bad ki MLA ki la dep ban ïakynduh ban ïakren bniah ïa kane ka kam”, u la ong.
Da kaba pynskhem ïa ka rukom treikam kaba khang pyrshah, u Myntri Rangbah u la byrngem ba ki nongkhaïi drok kin ym lait. U la kdew ïa ka jingkiew kaba jur ha ka jingpynjari aiñ, ha kaba ka jingïoh kurup drok ka la kiew da 103 percent bad ka jingpynjot ïa ki drok ka la kiew da 130 percent hapdeng u snem 2023 bad 2025.
U Saha u la pynskhem biang ïa ka jingkular jong ka sorkar ban ïada ïa ki samla bad ban khanglad ïa ka jingpynpra ïa ka jingïadei jong ka jylla ha ka jingkhaïi drok shabar khappud.
