Shillong, Jylliew 29
U Myntri ka tnat Jngoh-kai ka Jylla, Bah Paul Lyngdoh, u la pynbna ba ka Sorkar ka don jingthmu ban pynlong ïa ka jingïakop ban pynshlur ïa ki shnong ki thaw ba kin thung katba lah ïa ki dieng ‘cherry blossom’.
Ha kaba ïadei bad kane ka jingpynshlur, na ka liang jong u Myntri u la pyntip ba ki shnong kiba thung bun eh ïa ki dieng cherry blossom ym tang ba kin ïoh ïa ka jingithuh hynrei kin ïoh ruh ïa ka khusnam.
Na ka bynta kane ka kam, na ka liang jong u Bah Paul u la pyntip sha ki nongthoh khubor ba ka tnat Jngohkai kan sa ïatehlok bad ka tnat Khlaw.
U Myntri u la pynpaw ïa ka jingsngewnguh ïa ka tnat Khlaw halor ka jingkyrshan, haba kdew ïa ka jingpynphai ïa ka Nan Polok sha ka tnat Jngohkai bad ka jingai ïa palat 300 akar ka jaka ban tei ïa ki projek kam jngohkai.
Haba ïadei bad ka jinglong kongsan jong ka tamasa ‘cherry blossom’, u Myntri u la pynpaw ïa ka jingpdiang jong ka pyrthei ïa kane ka tamasa, haba kdew ïa ka jingïatreilang hapdeng ka Sorkar Meghalaya bad ka Japan, bad kumjuh ka jingwan jong u nongrah ktien ka Japan sha ka tamasa mynshem snem.
U la ban jur ruh ïa ka jingmyntoi jong kane ka tamasa ïa ki nongput nongtem trai shnong, kaba ai ïa ki ïa ka rynsan bad ka lad ban kamai. Mynta u snem, ka tamasa cherry blossom kan long ha ka 14 bad 15 tarik Naiwieng.
