Shillong, Jylliew 29
U MDC ka Tura, Bernard N. Marak u la kyrpad jur ïa u Myntri ka tnad kam pohïing ka Sorkar Pdeng, Amit Shah na bynta ka jingpyntreikam ïa ka ‘Agreed Text for Settle-ment (2014)’ bad ban khot ïa ka jingïalang ka komiti peit bniah ne ‘Monitoring Committee’ jong ka Sorkar Pdeng ha Tura.
“Nga thoh sha phi da ka jingsngewkhia kaba khraw na bynta ki ‘Scheduled Tribe’ ka Meghalaya, khamtam ki jaidbynriew Garo, ha kaba ïadei bad ka jingïai bteng ban ym pyntrei-kam ïa ka ‘Agreed Text for Settlement’ (ATS) – ka soskular hapdeng ki 3 kynhun ne ‘Tripartite Agreement’ ba la ïasoi ha ka 24 tarik u Nailur, 2014 hapdeng ka Sorkar India, ka Sorkar Jylla bad ka ANVC bad ANVC-B,” ong u Marak ha ka jingthoh ba la phah sha u Shah ha ka Sngi U Blei.
Haba kdew ba ki Garo ki la shah shet-kylla ha ka por jong ka Congress, u Marak u la ong ba kane kajuh ka dang ïai bteng haduh mynta, ha kawei ka liang kaba la pynbor ïa u ban thoh sha u Shah na bynta ka jingtuklar jong u.
Haba pynkynmaw ba ïa kane ka soskular la ïasoi hapoh ka jingïalam u Rajnath Singh, Myntri ka tnad kam pohïing ka Sorkar Pdeng (ha kato ka por), ka thmu ban pynkhlaiñ ïa ki Autonomous District Council (ADC) ha ka Jylla kumjuh ban wanrah ïa ka jingsuk bad ka roi ka par kaba neh ha ki jaka lum ka Meghalaya, u MDC u la ong ba wat hadien shiphew snem, kine ki jingkular ki shu sah kumto khlem da urlong.
“Wat hapdeng ka jingpyndem bad jingwanphai biang jong spah ngut ki dkhot sha ka imlang-sahlang, kiba bun kim pat shym la ïoh ïa ki song jingïarap ba la kular, wat hadien ba la dep ban pynshisha la bun kylla,” u la ong.
Une u MDC u la ong ruh ba komiti peit bniah kaba la bthah ban ïakynduh man ka hynriew bnai kam shym la khot jingïalang naduh ba sdang ka khlam COVID-19 ha u snem 2019.
“Shuh shuh, ka Sorkar Jylla kam shym la lah ban thaw ïa ka komiti peit bniah ha ka kyrdan jong ka Jylla kumba la rai bad ïa ka State Finance Commission, kumba la kdew ha ka soskular,” u la ong.
U la ong ruh ba ka long kaba pynduh mynsiem ban ïohi ba ïa ka pisa ba la thmu na bynta ki ADC, la ïathuh ba la pynkynriah ne pynslem lyngba ki heh ophisar – kaba pyntlot pat ïa ka nongrim jong ka soskular.
“Ka jingsahteng ban wanrah jingkylla ha ka riti synshar ban pynbun ïa ki shuki ha ki ADC ka dang sah kumto khlem pat leh eiei – kaba nang pynduh jingshaniah shuh-shuh ïa ki paidbah bad ki dkhot barim haba phai sha ka jingkular ka Sorkar,” u la ong.
U la bynrap, “Haba ïadei bad kane, nga kyrpad jur ïa ka jingtuklar jong phi ban bthah ïa u Joint Secretary (North East), ka tnad kam pohïing, ban khot ïa ka jingïalang jong ka Monitoring Committee ha ka kyrdan ka Sorkar Pdeng ha Tura – ka ‘Headquarter’ ka Ri-lum Garo – ha ka por kaba kloi eh.”
Na ka liang u Marak u la ong ruh ba ka jingïai bteng ban pynslem ha ka ban pyntreikam ïa ki kyndon ba la ïa mynjur lang, la shim ba ka dei ka jingshet kylla ïa ka soskular ki lai kynhun bad ka don jingma ban pynduh ïa ka jingkyrmen bad ka jingbha kaba ki paidbah Garo ki la buh hakhmat ka Sorkar Pdeng.
