Shillong, Jylliew 29
Ka seng saiñ pyrthei United Democratic Party (UDP) kaba ïatreilang bad ka National People’s Party (NPP) ha ka Sorkar Meghalaya Democratic Alliance (MDA)-2 kam pat shym la ïakren la kan pynneh biang ïa ki ar ngut Myntri ne kin bujli noh.
Haba ïoh ban ïakren bad katto-katne ngut ki MLA ka UDP, ki la ïathuh ba haduh mynta ka UDP kam pat shym la ïakren shaphang ka jingbujli ïa ki Myntri ha ka Sorkar MDA-2.
Ki la pynpaw ba lada ka UDP kam shym la ïakren ban bujli Myntri, ka pyni ba kine ar ngut ki Myntri Sorkar kiba don mynta kiba kynthup ïa u Bah Paul Lyngdoh bad Bah Kyrmen Shylla ki lah ban bteng haduh kaba kut jong ka san snem pura.
Kum ban shu pyn-kynmaw, ki khubor ki la mih ba ha ka NPP ki lah ban pynhiar shuki noh ïa ar ngut ki Myntri ban pynrung bujli da kiwei ki MLA jong ka, nangta ha ka HSPDP bad BJP kin sa ïa bujli noh ha u bnai Naitung, 2025 ban ïoh bat mar ar snem shiteng hynrei tang ka UDP ka bym shym la ïakren halor ka kam ba ïadei bad ka jingbujli Myntri.
Haba phai biang sha ka UDP kaba don 12 ngut ki MLA ha ïingdorbar thawaiñ bad ka ïoh ar ngut ban bat ïa ka shuki Myntri ha ka Sorkar Jylla.
Ki khubor ki ïathuh ba lada phai sha Khasi Hills, u Bah Paul Lyngdoh u lah ban bteng da kaba suk ban bat ïa ka shuki Myntri ha ka Sorkar MDA-2 namar dei tang ma u, uba kham slem ha ka UDP lait noh ïa u Bah Metbah Lyngdoh uba bat ïa ka shuki President jong ka seng.
Hynrei ki khubor ki ïathuh ba ka kham jwat mynta ïa ka UDP ha rilum Jaiñtia namar ki don sa ar ngut ki MLA kiba la jop mar ar sien kata u Bah Lahkmen Rymbui uba la jop arsien na ka UDP bad shisien kham mynshwa na ka Congress bad u Bah Nujorki Sungoh uba la jop arsien na ka UDP na Mowkaiaw Konstitwensi.
U Bah Lahkmen Rymbui, MLA na Amlarem Konstitwensi, u la bat teng ruh kum u Myntri ha ka Sorkar MDA-1 hynrei ha kane ka Sorkar MDA-2 u la duh namar la pynrung ïa u Bah Kyrmen Shylla, katba u Bah Nujorki Sungoh u khlem pat ïoh bat Myntri wat tang shisien ruh.
