Shillong, Jylliew 29
Ka Meghalaya Boxing Association (MBA) ryngkat ka jingïatreilang bad ka District Boxing Association ka la pynbna ba kan pynlong ïa ka prokram jied nongïakura ha man la ki district na ka bynta ka 39th National Games 2027 ka ban long ha ka jylla Meghalaya.
Kane ka jingjied ka long shi bynta ban sei ïa ka kynhun ka ban pyn-khreh ïa katei ka lympung kaba heh duh hapoh ka ri. Kumta ka rta jong ki nongïashim bynta na ka bynta baroh ki shynrang & kynthei ka long 17 haduh 40 snem, kat kum ka kyrwoh ba la pyllait da u Bah Larry Kharpran, Technical Director bad u Bah Dondor Marweiñ, Secretary ka MBA.
Kino-kino ki nongïa-shim bynta kiba kwah ban ïashim bynta na baroh 12 tylli ki District ki lah ban phone sha ki bor pynïaid ka synjuk ha kine number 9077573638, 8837417540 & 8794718004.
Ki kyrdan jingkhia ha ka liang ki shynrang ki long 47-50kg, 50-55kg, 55-60kg, 60-65kg, 65-70kg, 70-75kg, 75-80kg, 80-85kg, 85-90kg bad 90+kg, katba ha ka liang ki kynthei ki long ka 45-48kg, 48-51kg, 51-54kg, 54-57kg, 57-60kg, 60-65kg, 65-70kg, 70-75kg, 75-80kg bad 80+kg.
Ha Eastern West Khasi Hills yn pynlong ha ka 30 tarik mynta u bnai ha madan Pyndengumïong, Mairang ha ka por 9 baje mynstep. Kumjuh ha Ribhoi yn pynlong ha ka 3 tarik u Naitung ha Indoor Sports Hall, Saiden. Ha West Khasi Hills yn pynlong ha 5 tarik u Naitung ha Indoor Sports Hall, Nongstoiñ. Ha West Garo Hills & South West Garo Hills yn pynlong ha ka 8 tarik u Naitung ha PA Sangma Stadium, Tura bad ha Indoor Sports Hall, Ampati.
Ha East Garo Hills & North Garo Hills yn pynlong ha ka 9 tarik u Naitung ha Indoor Stadium, Williamnagar bad ha Indoor Stadium, Resubelpara. Ha South Garo Hills yn pynlong ha ka 10 tarik uNaitung ha Indoor Stadium,Bagmara. Ha South West Khasi Hills yn pynlong ha ka 17 tarik u Naitung ha Indoor Stadium, Mawkyrwat. Ha East Khasi Hills yn pynlong ha ka 21 tarik u Naitung ha Indoor Stadium, Mawlai.
Ha West Jaintia & East Jaiñtia yn pynlong ha ka 24 tarik u Naitung ha Indoor Stadium, Khlieh-riat bad ha Indoor Stadium, Jowai.
