Kyiv, Jylliew:
Ka Ukraine ha ka Sngi U Blei ka la pyntip ba ka Russia ka la leit hiar thma tyngeh pyrshah ïa ka Ukraine baroh shi miet, ha kaba ym duna ïa ka 6 ngut ki la mynsaw, kynthup ïa uwei u khynnah. La ong ba ka Russia ka la thombor haduh 537 tylli ki jingleit thombor nalor suiñ, kynthup ia 477 tylli ki drone bad ki decoy bad 60 tylli ki ‘namding. Na kitei, 249 tylli ki dei kiba la ioh ban tem noh da ki shipai ïada ri jong ka Ukraine bad 226 tylli pat ki la shu jah kumto bad ka lah ban dei namar ba ki la bthei lymwir noh ynda ki poi ha ki jaka ba don ki jingpluh bad jingbthei.
U President ka Ukraine, Volodymyr Zelensky, u la ong ba ka Russia ka thmu pynjulor ïa kiei-kiei kiba ktah ia ka jinglong-jingman bad ka jingim ki briew ha Ukraine bad u la kren ia kane hadien katei ka jingleit thombor jong ka Russia sha Ukraine, katba ka US ka dang pyrshang ban pynkut noh ia ka jingiakynad hapdeng ka Ukraine bad ka Russia, kaba la neh mynta lai snem tam.
U la iathuh ruh ba ka Ukraine ka la duh noh ia ka liengsuiñ iapom F-16 kaba lai, naduh ba sdang jong ka jingleit thombor biang jong ka Russia sha Ukraine, katba ka Ukraine ka dang pyrshang ban khanglad ia ki jingleit thombor jong ka.
“La jan baroh shi miet, ki liengsuiñ bad ki drone ka Russia ki sawa ha kylleng ka Ukraine – 477 tylli ki drone ki don halor suiñ jong ngi, kiba bun na ki, ki dei ki tiar jong ka Iran, ryngkat bad 60 tylli ki ‘namding jong ki jait namding bapher-bapher”, la ong u President ka Ukraine.
U Zelensky u la ong ba ka Russia kan ym sangeh katba ka dang don ïa ka jinglah ban siat ïa ki jingbthei ba heh, namar ba u la kdew ba tang ha ka taiew ba la dep, ki la don palat 114 tylli ki namding, palat 1,270 tylli ki drone, bad jan 1,100 tylli ki bom kiba ka Russia ka la leit thombor pyrshah ia ka Ukraine.
Namar u Zelensky u la ong ruh ba u Putin u la rai la slem ba un ïai bteng ia ka thma wat hapdeng ki jingkyntu jong ki ri pyrthei ban sangeh noh ia ka jingiakynad bad ban ialeh ban poi noh sha ka lad jingiasuk bad ka Ukraine. Kumta, u Zelensky u la kren shai ruh bad ong ba kane ka thma dei ban kut noh – dei ban pynbor ïa ki nongleh kam sniew bad kumjuh ban ai jingïada ia ka Ukraine kaba dei hok ban ioh ia ka jingiada na ki kam thombor jong ka Russia, kaba la neh da ki snem mynta.
