Shillong, Jylliew 30
Ka Laitumkhrah SC bad ka Pom-mura SC ki la bteng jingjop ha ka 4th Division Under- 20 Football league 2025 ba la pynïaid da ka Shillong Sports Association ha ka Lah Sngi U Blei.
Ha kane ka jingïakhun kaba la long ha SSA Stadium kaba ha First Ground Polo, ka Laitumkhrah ka la pynliem noh ïa ka Krang SC da 4-0 kol na ka bynta ban ïoh ïa ka jingjop kaba lai ha ka Group-E.
U Dabetskhem Rymbei u la thep ar kol ha ka minit kaba 24 & 37, katba ïa kiwei pat la thep da u Emerald Sohïong (55) bad u Banroi Kharkongor (70).
Lyngba kane ka jingjop ka Laitumkhrah ka la ïoh 9 point na ki lai sien ïakhun na ka bynta ban ïai bat ïa ka kyrdan ba ha khlieh ha katei ka group.
Kumjuh, ha ka jingïakhun jong ka Group-D, ka Pommura ka la pynliem noh ïa ka Umsohsun SC da 3-0 kol. U Willson Nongbri u la thep ar kol ha ka minit kaba 11 & 80+4 bad kawei pat na u Kitbok Thabah (43).
Lyngba kane ka jingjop ba ar, ka Pommura ka la ïaryngkat mar 6 point bad ka Mawphlang, kaba dang lamkhmat ha kane ka group.
Haba phai sha kawei pat ka jingïakhun jong ka Group-F kaba la long kham ha shwa, ka Mawlynrei SC ka la bteng ban lamkhmat hadien ba ka la ïakhaid mar 1-1 kol bad ka Lumpyngngad SC.
Ha kane ka jingïakhun ka Mawlynrei ka la pynkhih jar nyngkong eh lyngba u Ferdinand Pyngrope ha ka minit kaba 12, hynrei shwa ban kut ka jingïalehkai ka Lumpyngngad ka la lah ban pynphai kylla lyngba u Ignasius N Sangma (80+3).
Lyngba kane ka jingïakhaid, ka Mawlynrei ka la ïoh 7 point na ka bynta ban ïai bteng bat ïa ka kyrdan ba ha khlieh, katba ka Lumpyng-ngad ka la wan ba-ar ryngkat 4 point na ki ar sien ïakhun.
Ha ka Sngi Ba-ar kan don tang kawei ka jingïalehkai ha ka por 4 baje nohphai sngi hapdeng ka Laitkroh SC pyrshah ïa ka Thynroit SC.
