Nongstoiñ, Jylliew 30
Ka shlem treikam District Sports Officer (DSO) jong ka West Khasi Hills District ha ka Sngi Saitjaiñ ka la plie paidbah ïa ka shlem ai jinghikai phutbol ba la tip kum ka ‘Grassroot Centre’ kaba thymmai hapoh ka jingpeit jong ka Mission Football Initiative ha ka shnong Seiñduli West Khasi Hills.
Ïa katei ka jingïalang plie la pynlong ha madan Seiñduli ha kaba ka Kong Balarina Syiem (DSO) ka la wan ban plie pyrda kum ka kongsan ha ryngkat ka jingïadonlang u Rangbah Shnong ka Seiñduli u Bah Johnapual Ïawphniaw, ki ‘riew rangbah jong ka shnong, ki coach bad ki khynnah kiba la pyni ruh ïa ki drill ha katei ka madan.
Ka Kong Balarina Syiem haba kren kum ka kongsan ha katei ka sngi ka la ai khublei kyrpang ïa u MLA ka thaiñ u Bah Methodius Dkhar uba la ïohi jngai ban wanrah ïa ki kam pynroi hapoh ka dong ka thaiñ Mawshynrut.
“Ai ba ngin ïatreilang ban pynlong ïa kane ka Grassroot centre kaba pynmih ïa ki khynnah ki ban mih shakhmat, ki ban wanrah ïa ka nam ka burom nyngkong ïa ka shnong, ïa ka District hi baroh kawei bad ïa ka Jylla,” la ong ka jong Balarina.
Shuh shuh ka Kong Balarina ka la ong ruh ba ka jingtrei shitom ka ban wanrah ïa u soh jong ka jingjop bad ka jingtrei shitom ka jong phi.
Nalor kane, ka la ong ruh ba ki don ar ngut ki coach ban hikai ïa ki khynnah ha katei ka shlem ai jinghikai, kumta ka la kyntu ruh ïa ki khynnah ba kin long kiba don akor bad kohnguh sneng ïa ki jinghikai jong ki coach bad ruh ba kin kynmaw ruh de ban ïaid ryngkat ryngkat bad ka jingpule ka jong ki.
Ha katei ka sngi nalor ka kongsan, la donlang ruh u sordar ka shnong Seiñduli u Bah Johnpaul Ïawphniaw, ki ‘riew rangbah bad kiwei-kiwei de.
