Shillong, Jylliew 30
U Bah Kyrmen Shylla uba dei uwei na ki nongïalam ka United Democratic Party (UDP) bad ruh u Myntri hapoh ka Sorkar Jylla, u la pyntip ba ka seng ka la ai bor ha u President ka UDP ban rai halor ka jingthung ïa u General Secretary bathymmai jong ka seng.
Ka shuki General Secretary ka la sah thylli noh hapoh ka UDP hadien ka jingiehnoh kam bad mih noh jong u Dr. Jemino Mawthoh, uba dei u MLA barim ka Nongthymmai uba la bat ïa kane ka shuki la slem.
Haba kren sha ki lad pathai khubor ha ka Lah Sngi U Blei, u Bah Kyrmen u la ong ba ha ka jingïalang kaba dang shu dep, ka UDP ka la rai ban ai bor ha u President ka UDP, Bah Metbah Lyngdoh, ban rai ïano yn thung General Secretary bathymmai.
“Ha ka jingïalang ba dang shu dep, ngi la ai bor ha u President ba un shim ïa ka rai bad ban pyndap ïa ka jaka ba thylli kham kloi kat kaba lah,” la ong u Bah Kyrmen bad u la ïathuh ba u President ka UDP un sa lum ïa ka jingïalang ban shim ïa ka rai kaba khatduh halor kane ka kam hadien ba u la wan phai sha Shillong.
Haba kylli la tang ki MLA ki lah ban shimti ïa ka kam General Secretary, u Bah Kyrmen u la ong, “Kam don satia kaba kum kata ka kyndon ha ka riti treikam jong ngi bad mano-mano ruh ki lah ban shimti kum u GS bathymmai”.
“Ka seng kan sa rai. Ngi don hangne ban shakri. Kam pher la nga long General Secretary ne em. Kano-kano ka kyrdan ba nga bat, ngin ïa trei na ka bynta ka seng,” la ong u Bah Kyrmen.
