Shillong, Jylliew 30
Kum shibynta ban kyntiew ïa ka pule-puthi hapoh ka thaiñ War Jaiñtia, ka KSU War Jaiñtia Circle sa shisien ka la ïoh ban pynkup burom ïa ki samla pule ka thaiñ kiba la wan shakhmat ha ki eksam bapher-bapher. Ha kane ka sngi la wan sakhi ruh da ki kmie ki kpa bad nonghikai jong ki khynnah skul ha ki shnong bad skul bapher bapher.
Ha kane ka sngi u samla Donald V Thabah, General Secretary ka KSU CEC u la long kum Kongsan, u Bah Army Lipon, President Synjuk Waheh Shnong Ri Jaiñtia kum Symbud Kongsan la don ryngkat lang ruh u samla Pynkmenlang Sanmiet, Education Secretary KSU CEC, ki nongïalam jong ka KSU Jaiñtia Hills District Unit naduh u President samla Laitphar Syngkrem, General Secretary samla Lenningrad Tariang, Vice President samla Chanbor War bad kiwei, ki nongïalam jong ka War Jaintia Circle President samla Lop S Khonglah, General Secretary samla Platini Mukhim, Education Secretary Ladaplin Hayong bad kiwei. Ki nongmihkhmat sha District Council kata ki MDC ba kynthup ïa u Bah Jamshaphrang Pohtam, Bah Medling M Swer, Kong Deiwi Tongper bad kiwei de ki ‘riew pawkhmat ka thaiñ War Jaiñtia.
La ïoh ruh ka jingkren bad jingsneng jingkyntu na u samla Donald V Thabah, u President Synjuk Waheh Shnong Ri Jaiñtia, Bah A Lipon bad ruh na ki MDC bad kiwei de ki ‘riew rangbah. Ha kane ka sngi la wan ban ïa shim bynta ruh da ki samla pule ka Synod College Shillong kum shi bynta ba ki wan ban leh ïa ka Research ka jong ki na ka bynta kane ka prokram pynkup burom ïa ki samla ka thaiñ.
Haba ai ka jingkren la kyntu kynpham ïa ki samla ba ki khmih lynti ba kine ki samla kin long ka jingkyrkhu ki ban kyntiew ïa ka pule puthi, ka roi ka par ka bad nuksa ïa kiwei pat ki khynnah skul hapoh thaiñ War Jaiñtia bad jaidbynriew Khasi hi baroh kawei. U samla Donald u la pynkynmaw ba ka jaidbynriew ka la nangïai kiew ha baroh ki liang bad kam don jingeh ban poi sha kliar jong ka nam lada minot bad kut jingmut ban trei shitom ïa ka kam kaba thrang bad angnud.
