Da ka tari ot u samla ïa ka baieid na ryndang ha jaka ïeng kali Pyndenumïong, Mairang

Shillong, Jylliew 30

Kawei ka jingjia kaba sngewtriem bad shyrkhei ha kaba uwei samla u la ot da ka tari ïa la ka baieid ha jaka ïeng kali ha Pyndenumïong, Mairang ha ka janmiet jong ka Lah Sngi U Blei, ka 30 tarik u Jylliew 2025.

Kane ka jingjia ka la jia ha ka por kumba 5 baje eiei, ha kaba utei u samla u la ot da ka tari hakhmat u kpa jong katei ka samla.

Katei ka samla kaba la shah ot da ka tari ha u baieid ka la mynsaw jur ryngkat ka phlei snam kaba shyrkhei haduh katta-katta bad hadien kata la pynkit noh sha Civil Hospital Mairang ban shah sumar. Pynban mar shu poi ha katei ka jaka sumar katei ka samla ka la khlad noh, katba utei u samla uba la leh ïa katei ka kam pap u la shah kem noh ha ki pulit ka Thanat Mairang.

Katei ka samla kynthei kaba shah ot ryndang ka dei ba la tip kyrteng kum ka Phyrnailin Kharsyntiew, 27 snem ka rta. Haba ïoh ban ïakren bad u Sordar ka Pyndenumïong, Bah Bornad Syiemïong lyngba ka phone, u la ïathuh ba kane ka jingjia ka dei kaba la jia mynta hi ka janmiet ha ka por kumba 5 baje tam eiei ha kaba utei u samla u la ot da ka tari ïa ka samla na ryndang ha parking lot Pyndenumïong, Mairang. Haba kylli pat, na kaei ka daw ba utei u samla u la shim ïa katei ka sienjam ban ot da ka tari ïa ka samla, u Sordar u la ïathuh ba katkum ka jingïohsngew ba ka dei na ka daw ba ki don ka jingïakwah ban ïalait noh bad ïa huri-hura hapdeng jong ki, kumta utei u samla u la sei da ka tari ban ot na ryndang jong katei ka samla. U la ïathuh ba ha ka por ba utei u samla u la ot da ka tari na ryndang ka samla la don noh ki paidbah ki la leit ban ïarap mar shu ïohi ïa katei ka jingjia, hynrei namar ba ka jingphlei snam ka la jur palat katei ka samla ka la khlad noh.

U Bah Bornad Syiemïong u la pyntip ba ka met jong katei ka samla ka dang don ha Civil Hospital Mairang ha kaba ki bor pulit kin sa pyndep ïa ka post mortem ha katei hi ka jaka sumar. Shuh shuh u la pyntip ba ïa utei u samla ba leh ïa kane ka kam ki pulit ki la dep rah ban leh ïa ka Medical Check-up ha katei hi ka jaka sumar bad hadien kata ki la rah biang sha thanat.