Shillong, Jylliew 30
Ha ka step Lah Sngi U Blei, ka Confederation of Meghalaya Social Organisation (COMSO) ka la hiar ban jurip ïa ka infiltration check post lane ka khyrdop talasi ïa ki briew ba wan rung lyngba ka Ratacherra, East Jaiñtia Hills ban bishar bniah ïa ka rukom pynshisha ïa ki briew kiba wan rung lyngba kane ka khyrdop.
Ïa kane ka kynhun la ïalam da u Sambormi Lyngdoh, Vice Chairman ka COMSO Jaiñtia Hills Region. Kane ka kynhun ka kynthup ïa ki dkhot na ki sengbhalang – ka Hynñiewtrep Youths’ Council (HYC), ka Jaiñtia National Council (JNC) bad kiwei-kiwei.
Kane ka jingjurip ka long ban pynthikna ba ki briew ha kane ka khyrdop ki shim ne em ïa ki lad ki lynti kiba biang ban pynshisha ïa ki kot ki sla jong ki ‘riewshimet kiba wan rung sha kane ka jylla bad ban khanglad ïa ki briew kiba nabar ki bym biang ki kot ki sla ban wan rung sha ka Jylla Meghalaya.
Ha kane ka jingjurip la don ki briew kiba la shah bat bad la pynphai biang namar ka jingbym don ki kot ki sla kiba biang.
U Bah Sambormi Lyngdoh u la ban jur ïa ka jingdonkam jong kane ka khyrdop da kaba ong ba ki briew kiba nabar ki bym lah ban pynshisha ki lah ban wanrah ïa ki jingeh bapher-bapher hapoh ka jylla bad pynkheiñ ïa ka hok jong ki trai shnong.
Kane ka sienjam jong ka COMSO ka long shi bynta ban weng ïa ka jingwan buhai shnong beaiñ jong ki briew kiba nabar sha kane ka jylla Meghalaya.
Ha ka jingïalang kaba la long ha ka 21 tarik u Naitung, ka COMSO ka la mynjur ïa ka rai ban bishar bniah ïa baroh ki khyrdop lane ki infiltration check post ha kylleng ka jylla.
Ka COMSO ka thmu ban jurip ïa ka jingtreikam jong kine ki jaka talasi bad ban shim ïa ki sienjam kiba tyngeh lada donkam. U la ong ba kane ka dei tang ka jingsdang, bad ki lad ki lynti ba kongsan ban weng ïa ka jingwan tuid ki briew yn sa pyntreikam ha ki por ban wan.
Kane ka jingsdang khynra jong ka COMSO ka long namar ka jingdawa ïa ka Inner Line Permit (ILP) ha Meghalaya, kaba thmu ban pynbeit ïa ka jingwan rung ki briew kiba nabar sha kane ka jylla.
