Shillong, Jylliew 30
Ka Committee on Petitions jong ka Meghalaya Legislative Assembly ryngkat bad ka shlem treikam jong u Deputy Commissioner ka Ri Bhoi District, ki la pynlong ïa ka prokram ai jingpynshai bad ki Block Development Officer (BDO), Self Help Group (SHG) bad ki kynhun bapher-bapher ha Nongpoh.
Ïa kane ka prokram ba la pynlong ha ka Lah Sngi U Blei la pynïaid da u MLA ka Mawlai bad Acting Chairman ka Committee, Bah Bright-starwell Marbaniang namar ka jingbym lah ban poi u Chairman Pongseng Marak, MLA ka Bajengdoba.
Ki MLA kiba dei ki dkhot ka committee kiba la ïashimbynta ki kynthup ïa u Remington Gabil Momin, Bah Charles Marngar bad u Dr. Mizanur Rahman Kazi, ha kaba la wan ban ïashimbynta lang u Bah Mayralborn Syiem kum MLA ka Nongpoh, u Abhilash Baranwal kum Deputy Commissioner jong ka Ri Bhoi District.
Ha kane ka jingïalang baroh saw ngut ki BDO ka Ri Bhoi District ki la ïashimbynta ha kane ka prokram, kaba thmu ban pynsngewthuh shaphang ka kamram bad ki jingkitkhlieh jong ka Committee on Petitions bad ki rukom treikam ki jong ka ban don ka jingïadei hapdeng ki nongshong shnong bad ka ïingdorbar thawaiñ ka jylla.
U Bah Brightstarwell haba ai jingkren ha ka jingïalang u la pynpaw ïa ka jingsngewtynnad ha kaba ki la ïoh ïa ka lad ban ïakren markhmat bad ki shnong ki thaw bad ban jur ïa ka jingdonkam ban ai ïa ka jingpynsngewthuh shaphang ka ïingdorbar.
Ka Petition Committee ka shakri kum ka rynsan na ka bynta ki nongshong shnong ba kin pynsngew ïa ki jingsngewkhia bad ïa la ki jingeh sha ka ïingdorbar. Kiba bun ki la tip shaphang ki lai tylli ki païa kiba kynthup ïa ka Legislature, Executive bad Judiciary bad kumta la don hangne ban pynsngew ba kumno ka ïingdorbar lyngba kiba bun ki committee kum ka Petition Committee ka pynthikna ban don ïa ka jingai jingkheiñ kaba khuid bad suba bad kaba ïadonbynta lang bad ki paidbah”.
Na ka liang jong u Bah Charles Marngar pat u la pynshai ïa ka bor jong ka Committee bad u la pynshlur ïa ki SHG bad ïa ki kynhun bapher-bapher ba kin mih shakhmat ban wanrah ïa ki mat bad ïa ki jingsngewkhia khnang ba ka Committee kan ïoh ban pynsngew sha ka ïingdorbar thawaiñ ka jylla.
U Remington Gabil Momin, u la kyntu ïa ki nongshong shnong ba kin ai ka jingïatreilang na ka bynta ban kyntiew ïa ka shnong ka thaw.
“Ngi kyntu ïa ki SHG bad ki kynhun bapher-bapher ba kin wanrah ïa ki jingud jingnam ki jong ki sha ngi. Ka committee ka don hangne ban shim ïa kine bad ban rah sha ka ïingdorbar. Ngi pynshlur ïa ki ‘riewshimet kiba la nang la stad ba kin ïarap lem ïa kito ki bym nang bym stad ba kin lah ban pynpaw ïa ki jingeh ki jong ki”.
U Dr. Mizanur Rahman Kazi, u la pynpaw ïa ka jingkongsan bad ïa ka jingdon jingmut jong kane ka committee. “Ka Petition Committee ka dei kawei na kiba la rim tam bad ka committee kaba kongsan tam hapoh ka ïingdorbar. Ka lah ban long kum ka jingkieng kaba pynïasoh ïa ki paidbah bad ki nongthawaiñ. Ka jingwan ka jong ngi mynta ka sngi ka long ban ïarap ïa phi ban sngewthuh kumno ka treikam bha kane ka atiar ban shimkhia ïa ki mat sngewkhia ki jong phi”.
U Bah Mayralborn Syiem u la pdiang sngewbha ïa kane ka sienjam bad u la ai khublei ïa ka committee kaba la pynlong ïa kane ka prokram ha Nongpoh.
“Kiba bun hi kin ym tip eiei shaphang kane ka Committee bad ka rukom treikam ka jong ka. Nga kyntu ïa ki paidbah ka Nongpoh bad ka Ri Bhoi ba kin pyndonkam kat kaba lah bad ban mih shakhmat bad ki jingsngewkhia ki jong ki, khnang ba ka Committee kan lah ban shimkhia lem bad ka sorkar.”
Ki nongïashim bynta na ki SHG bapher-bapher ki la pynpaw ïa ka jingsngewnguh ïa kane ka sienjam bad pynpaw ruh ïa la ki jingsngew bad ïa ki jingtynjuh kiba ki mad bad pynpaw ïa ka jingsngewtynnad ban ïoh ïa ka lad ban ïakren markhmat bad ka Committee bad ka kyrpad ïa ka Committee ban shimkhia bad ban pynbeit lem ïa ka jingsngewkhia ka jong ki.
