Shillong, Jylliew 30
Ka Kong Angela Rngad kaba dei ka Adviser ka Meghalaya and Greater Shillong Progressive Hawkers and Street Vendors Association (MGSPHSVA), ka la kynthoh tyngeh ïa ka Shillong Municipal Board (SMB) kaba pyrshang ban pynthut ïa ka shongsuk shongsaiñ da kaba pyrshang ban kyndang jubor ïa ki nongshong bad ki nongdie jingdie ha Khyndai Lad.
Ka la ong ba ki nongdie dukan madan ha Khyndai Lad ki la kyntait mardor ban mih na ka thaiñ Khyndai Lad kum ka dak ban pyrshah jur ïa ka jingkyndang jubor jong ka Shillong Municipal Board (SMB) ha ka step Sngi Nyngkong, ka 30 tarik u Jylliew 2025.
Katkum ka MGSPHSVA, ki nongshong dukan bad ki nongdie madan kin kynriah na Khyndai Lad tad haduh ban da pynbeit shwa ïa ki jingduna bad ki jingbakla da ka Provisional Town Vending Committee (PTVC).
Kane ka jingkyndang ïa ki nongdie madan ha Khyndai Lad ka dei kaba la leh hakhmat ka jingdon ki Majistor bad ki pulit hadien ba ka Sorkar Jylla ka la pynmih ïa ka jingpynbna ha ka 21 tarik u Jylliew 2025, ba ka bynta kaba shapoh ne Ground Floor jong ka Meghalaya Urban Development Authority (MUDA) kum ka ‘Zending Zone’ ne ka jaka ban shong die jingdie bad ki bynta ba sah jong ka thaiñ Khyndai Lad kan dei ka ‘No Vending Zone’ ne ka jaka ka bym shah ban shong die jingdie.
Ka Kong Angela ka la kynnoh ba ka jingwan kyndang jubor ka long kumba ki shu leh khleh biej.
“Ngin ym ai lad ïa ka Shillong Municipal Board (SMB) ba kan kyndang ïa ki nongshong die madan. Ngi ngin ym kynriah da lei-lei ruh em na kane ka jaka tang hadien ba ngi lah ïoh ïa ka Plan ne ka jingpynkhreh,” ka la ong.
Ka la ong, ba ka Meghalaya and Greater Shillong Progressive Hawkers and Street Vendors Association (MGSPHSVA) ka la ïai dawa naduh u bnai Kyllalyngkot (January) na ka SMB, ban pynsangeh ïa ki kam ki jam hynrei ka la ïaid beit shakhmat ban shna ïa ka jaka ha khrum jong ka MUDA khlem ka jingïoh jingmynjur na ka PTVC.
Ka Kong Angela ka la kynnoh ruh ba katei ka jaka kaba la ithuh ha MUDA kam long kaba bit kaba biang ban die shong die jingdie bad kam long ruh kaba shngaiñ na ka bynta ki nongdie jingdie bad ki nongwan thied jingthied ruh kumjuh.
“Ki (SMB) ki dei ban wanrah ïa katei ka Plan ne jingpynkhreh hakhmat jong ka PTVC. Kane ka dei namar ba ngi dei ki dkhot kiba la shah pynkup bor jong ka bad ngi dei ma ngi ki ban rai kumno ban ïaid shakhmat (halor ka jingthmu ban pynkynriah ïa ki nongshong die madan),” la ong ka Kong Angela.
Shuh shuh ka la ong “Ngim shym la ong ba ngin ym kynriah na Khyndai Lad, hynrei ngin kynriah katkum ki kyndon, ryngkat bad ka banjur ïa ka jingdonkam ban pynbeit ïa ki jingduna baroh”.
Haba kylli pat shaphang kitei ki jingduna, ka Kong Angela ka la ong ba naduh kaba sdang, ngi la ong ban leh ïa ka ‘Insitu Survey’ ban tip ïa ki nongshong dukan bad ki nongdie madan kiba dei hok ban pynlong ïa ka jingkam bad ka jingpyrshah ban ïohi la katei ka jingjurip kan kynthup shisha ïa ki nongdie madan kiba dei hok lane kin don ne em ki ban shim kabu ïa kane bad kane ka kam ka la poi shaduh u pud ïa ka jingai ïa ki lisen. Kum ka dkhot jong ka PTVC, ngi lah kdew ba ngi tip thikna ba ki don ki briew kiba don ïa ki dukan kiba heh, hynrei ki la ïoh pat ïa ka lisen ban shong die madan. Kumta ngi lah dawa ba donkam ban pynbeit noh ïa kitei ki jingbakla bad jingduna ha shwa ban ïaid shakhmat bad katei ka kam, namar phin sa thaw shuh shuh ïa ki jingeh lada phi ai ïa ki lisen sha ki briew ki bym dei hok ban ïoh,” ka la bynrap.
Ka Kong Angela ka la kdew ruh, “Kawei ka longkmie kaba la shong die jingdie hangne mynta la palat 30 snem, hynrei kam shym la ïoh ïa ka lisen. Kane ka pyni ba ka jingleh ïa ka Digital Survey ka la pulom.”
“Ka Digital Survey kam shym la don ïa ki dur ki dar jong ki nongdie madan, kaba ka kyrteng ka jong ki ka la mih ha ka thup kyrteng,” la kynnoh ka Kong Angela Rngad.
