Shillong, Jylliew 30
U Khariksing Adonis Tangpu na Manipur u la long kum lahduh, katba u Kevin John Kyllait (Megha -laya) bad u Arianborlang Mawblei (Meghalaya) ki la wan ha ka kyrdan ba-ar bad balai ha ka jingïakop ñiah saikil ba la tip kum ka MTB Cycling Compe-tition 2025 ba la pynlong da ka North-Eastern Hill University Students’ Union (NEHUSU) ha ryngkat ka jingïatreilang bad ka Meghalaya Cycling Association (MCA) ha ka Sngi Saitjaiñ ha NEHU.
Kane ka jingïakop ñiah saikil ka la sdang ha ka por 10:30 mynstep bad kut ha ka por 12:30 mynsngi ha kaba la wan ban sakhi lang da u Prof. Sumarbin Umdor, Pro-Vice Chan-cellor ka NEHU, Shillong, kumjuh u Bah Lening Bareh, President ka Meghalaya Cycling Asso-ciation (MCA), Bah Treiborlang K. Musalman, Asst. General Secretary ka Meghalaya Cycling Association, u Sandy Sohtun, President ka NEHUSU bad kiwei-kiwei.
Ïa ka kyrdan consolation prize la ïoh da u Ronel Khundrakpam, Tajum Dere (Arunachal Pradesh) bad u Riviklang Lyngdoh Nonglait (Meghalaya). Kitei ki nongjop ki la ïohpdiang da ki song pisa ba T. 30,000, T. 20,000 bad T. 10,000 ïa kiba wan ba nyngkong, ba-ar bad balai. Katba kiwei pat ki la ïoh mar T. 5,000.
Na ka liang ki bor pynïaid ki la ai khublei ïa baroh ki nongjop bad pynpaw ïa ka jing-sngewnguh kaba khraw ïa uwei-pa-uwei u nong-ïashim bynta bad ki nongtrei mon sngewbha kiba la noh synñiang sha ka jingjop jong kane ka prokram ñiah saikil. Katei ka jingïakop ñiah saikil MTB 2025 ka la long ka sienjam kaba kongsan ha ka ban kyntiew ïa kane ka jingïañiah saikil bad ban wanrah ïa ka mynsiem ïalehkai ha ka thaiñ.
